Jańa tehnologııalarǵa qajettilik artqan saıyn ǵylym álemindegi jetistikter alǵa shyǵyp, aqparattyq júıeniń oqyrman suranysyna saı jumys isteıtini zańdylyq. «Nur Otan» partııasy Jambyl oblystyq fılıaly men oblystyq mádenıet, arhıvter jáne qujattama basqarmasy arasynda jasalǵan memorandým negizinde Sh.Ýálıhanov atyndaǵy oblystyq ǵylymı-ámbebap kitaphanasynda 30 adamǵa arnalǵan «Brodkastıng» zaly ashyldy. Sonymen qatar 10-ǵa jýyq kompıýter men 6 monoblok qoıylǵan elektrondy zal da zaman talabyna saı jasaqtalǵan.
«Brodkastıng» zalynyń tusaýkeser rásimine oblys ákiminiń orynbasary Erqanat Manjýov qatysyp, jańa aqparattyq tehnologııalarmen jabdyqtalǵan zaldarmen tanysty. Munda kitaphana qyzmetkerleriniń jumysyn bir júıege túsirýge túrli múmkindikter de qarastyrylǵan eken. Máselen, A4 formatyndaǵy 3D prınterler, monobloktar jáne joǵary jyldamdyqty ınternet jelisi bar. О́z sózinde «Nur Otan» partııasy oblystyq fılıaly tóraǵasynyń birinshi orynbasary Murathan Shúkeev Elbasynyń tapsyrmasyna sáıkes qabyldanǵan «Sıfrly Qazaqstan» baǵdarlamasyn júzege asyrý maqsatynda partııanyń 10 strategııalyq joba belgilegenin aıtty.
– Sonyń ishindegi eń mańyzdy máselelerdiń biri – sıfrlandyrýǵa kóshý, sondaı-aq jastarǵa aqysyz IT-synyptaryn ashý, ózin-ózi jumyspen qamtyǵan azamattardy aqparattyq tehnologııalar ortalyǵynda oqytý qolǵa alynýda. Al «Brodkastıng» zaly Qazaqstannyń zamanaýı kitaphanalary jobasy aıasynda ashyldy. Bul bastama kitaphanalar júıesin sıfrlandyrýdy kózdeıdi, – dedi ol.
Jańa ashylǵan «Brodkastıng» zalynda beınekonferensııalar ótkizýge múmkindikter bar jáne oblys aýdandaryndaǵy 10 kitaphana da onlaın júıege qosylǵan. Sonymen qatar Sh.Ýálıhanov atyndaǵy oblystyq ǵylymı-ámbebap kitaphanada qundy kitaptar serııasyna engizilgen 5539 kitaptyń elektrondy nusqasy jasalǵan eken. Kitaphana dırektory Elmıra Abdınovanyń aıtýynsha, munda jergilikti aqyn-jazýshylarmen kelisilip 100 kitap sıfrlandyrylǵan. Jáne búginde 5639 týyndyny oqyrmannyń elektrondy formatta oqýǵa múmkindigi bar. Búgingi tańda ólketaný kitaptaryn sıfrly júıege kóshirýge daıyndyq jumystary júrgizilip keledi. Atalǵan júıe arqyly respýblıkalyq jáne ortalyq kitaphanalar arasyndaǵy baılanys artyp, kitaphanalar ózara elektrondy túrde ádebı shyǵarmalar almasatyn bolady.
Hamıt ESAMAN,
«Egemen Qazaqstan»
Jambyl oblysy
