Mınıstrdiń aıtýynsha, 2018 jyldyń basynan beri ólim qaýpi joǵary bakterııalyq menıngokokk ınfeksııasy kúdigimen 593 adam qaralǵan jáne 213 adam emdeýge jatqyzylǵan. Olardyń arasynda 58 naýqastan menıngokokk ınfeksııasy rastaldy. Naýqastar arasynda 14 jasqa deıingi balalar sany - 21. Búginge deıin on adam emdep shyǵaryldy jáne 55 naýqas em alyp jatyr.
«Atalǵan syrqattan 13 adam qaıtys boldy: Almaty oblysynda - 4, Qyzylorda oblysynda - 1, OQO - 2, Almaty qalasy - 6 adam. О́kinishke qaraı, qaıtys bolǵandar arasynda alty bala bar», dedi mınıstr.
Sondaı-aq, ol menıngıtpen kúres boıynsha arnaıy shtab qurylǵanyn habarlap, Premer-Mınıstrden shtab jumysyna kómek berýdi surady.
«Qurmetti Baqytjan Ábdiruly, oblys ákimderine, densaýlyq saqtaý basqarmalarynyń óńirlik shtabtarynyń tıisti jumysyn jáne bekitilgen respýblıkalyq shtabtyń josparyn, tapsyrmalaryn múltiksiz oryndaýdy qamtamasyz etýdi suraımyn. Sonymen birge, QR Jedel medısınalyq kómek kórsetý týraly qaǵıdalaryn bekitý týraly №450 buıryqqa sáıkes, kezek kúttirmeıtin jaǵdaılar kezinde medısınalyq kómek jaqyn jerdegi medısınalyq uıymda kórsetilýi tıis. Oblystardyń emdeýge jatqyzý tártibi týraly barlyq buıryqtardy Densaýlyq saqtaý mınıstrliginiń buıryqtaryna sáıkes keltirilýi tıis», dedi mınıstr.
