«Astana» – izet kóńildiń belgisi

«Astana» dramasynda Ar­qa tósinen ǵajaıyp qala sal­ǵan Elbasynyń qahar­mandyǵy, toqyraý jyldarynda tosyrqap qalmaı, elin tyǵy­ryqtan aman-esen alyp shyqqan tynymsyz eńbegi men erligi, qaıratkerlik qasıet­teri naqty tarıhı oqıǵalar negizinde shıratyla otyryp, uıǵyr teatrynyń sahnasynda alǵash ret kelisti kórkem beıne retinde usynyldy. Spek­takl Astananyń 20 jyldyq mere­kesine oraılastyryla qoıy­lyp otyr. Bul spektakl uıǵyr teatrynyń, sol teatr­da eńbek etetin uıǵyr óner ujymynyń Astanaǵa ǵana emes, tutas qazaq eline rıza­shy­ly­ǵynyń, izet kóńiliniń dá­leli ispettes.

Jazyq daladaǵy shaǵyn qalany shyraıly shaharǵa aınaldyryp, Astana jasaý ıdeıasy Prezıdenttiń per­­­zenttik júreginen áb­den ıi qanyp shyndyqqa aı­nal­­ǵa­nyn dramatýrg pen rejıs­ser sheberligimen ja­sal­ǵan utymdy shtrıh, senim­di de­tal, tolymdy dıa­log­tar dáleldeı túsedi. Al­ǵash­­qy ala­­sapyran kezdegi aýyrt­pa­lyqtar týraly kóbirek oılap, keýdesinde tunǵan ańsar­ly armanyna únemi alańdap júrse de, «jeti ret ólshep, bir ret kesetin» minezimen keıinge ysyratyn tereń tolǵanysyn avtor áserli sýretteıdi. Qo­ıy­­lym bastan-aıaq Astana qa­la­­synyń órkendeýin Elba­sy atymen baılanystyra qa­raıdy. Aınalasyndaǵy qar­sylyqtarǵa qaramastan qazaq eliniń keleshegi úshin tarıhı taǵdyrly sheshim qabyldaýy naǵyz qaharmannyń isi eke­nin kórkem shejiremen kór­setedi. Tuǵyryna qalt-qult etip qonaqtap jatqan táýelsizdiktiń bultartpas aı­ǵa­ǵy, «dáleli –  mynaý» degizetin naqty mysa­ly, keıingi jyldardaǵy aı­bar-aıbyny Alataýdan Arqaǵa bet túzegen uly kóshtiń kerýe­ninde jatqanyn kórermen de bar julyn-júıkesimen sezip otyrady.

Uıǵyr ádebıetiniń kór­nekti ókili A.Ashırıdiń ja­ńa pesasy jıyrma jyl burynǵy Astananyń turǵy­zylý tarıhyna sheginis-sholý jasaı otyryp, teatr men onyń kórermenderine Elba­synyń kórkem tásilmen baıy­tylǵan jańa shynaıy obrazyn syılady. Spek­takldiń premerasyna ke­lip qatysqan Mádenıet já­ne sport mınıstri Arys­tan­bek Muhamedıuly res­pýb­lıka teatr sahnalary da­ıyndap jatqan tartý-týyn­dylardyń ishinde «As­tana» qoıylymynyń aıy­ryqsha bolǵanyn atap ót­ti. «Búgingi spektakl úshin Murat Ah­madıev pen Ahmet­jan Ashı­rıge rah­metimdi aıtamyn. Ras, tama­shalaǵan spek­takldiń salma­ǵy­nyń zor ekenin erekshe atap ót­ke­nimiz oryndy. Se­be­bi táýelsizdiktiń eleń-ala­ńyn­daǵy aýyr kezeńniń shyn­dyǵyn kórsetý ońaı emes. M.Ahmadıevtiń kásibı sheber­liginiń arqasynda Uıǵyr teat­ry bul ıdeıany júzege asy­ra aldy. Alda Astananyń 20 jyldyǵy aıasynda Uıǵyr mem­­lekettik akademııalyq drama teatrynyń halyq­ara­lyq gastrolin uıymdas­tyrý isi josparda turǵa­nyn, teatrdyń taıaý ýaqyt­ta kúr­deli jóndeýden ótkizi­le­ti­nin aıtyp, sizderdi qýant­qym keledi», dedi mınıstr A.Muhamedıuly.

Aıgúl AHANBAIQYZY,
«Egemen Qazaqstan»

ALMATY