Mádenıet jáne sport mınıstrligi jáne Mańǵystaý oblysy ákimdiginiń qoldaýymen Qazaqstan Respýblıkasy Avtomotosport federasııasynyń uıymdastyrýymen Halyqaralyq avtomobıl federasııasynyń FIA Rallı Reıd Álem kýbogynyń kezeńi Mańǵystaýda 27 mamyr men 2 maýsym aralyǵynda ótedi.
– Elbasymyz Nursultan Ábishuly Nazarbaev «Sport – beıbitshilik pen tatýlyqtyń, yntymaqtastyq pen tilektestiktiń sımvoly» dep atap ótkendeı, sport – qoǵamnyń tiregi! Ony árbir sportshy júregimen túsine bilý qajet. Sondyqtan da salamatty ómir saltyn ustanatyn qazaqstandyqtar jyldan-jylǵa kóbeıip keledi. Ony qurlyq, álem jáne Olımpıada jarystarynda qazaqstandyq sportshylardyń baǵyndyrǵan belesterinen naqty kórýimizge bolady, – dedi Mańǵystaý oblysynyń ákimi Eraly Toǵjanov avtoalamannyń ashylý saltanatynda.
«Rallı Reıd Álem kýbogy» kezeńi boıynsha ótkizilip jatqan baıqaýda 13 elden 64 avtoshabandoz chempıon ataǵy úshin baq synassa, Qazaqstan atynan 7 júırik qatysýda.
Alty kezeńnen turatyn saıysta qatysýshylar 2500 shaqyrym joldy eńserýi qajet. Birinshi kezeńde olar Aqtaý qalasynan shyǵyp, ońtústikti betke alyp 210 shaqyrym ońtústik-shyǵysta ornalasqan Kendirli shıpajaıyna barady. Ekinshi kúni Senek eldi mekenniń aınalasyndaǵy aınalma ýchaskesi arqyly shól dalamen shyǵysqa, úshinshi kezeńiniń baǵyty Kendirliden shyǵysqa qaraı jol júredi. Tórtinshi kezeńi Jańaózen qalasy aınalasynda ótedi, sodan keıin qatysýshylar Aqtaý qalasyna oralady. Ekinshi qorytyndy kezeńi Aqtaý qalasynan soltústikke qaraı baǵytta ótedi. Aıaqtaý kezeńinde sportshylar Kaspıı teńizi jaǵalaý syzyǵymen ótip, 2 maýsymda Aqtaý qalasynda jaǵalaý alańynda aıaqtady.
«Rallı Qazaqstan-2018» Ulttyq synypqa jáne T1, T2, T3 avtokólikterdiń kategorııasyna arnalǵan. Naqtyraq aıtsaq, T1 – jaqsartylǵan serııalyq avtomobılder, T2 – serııalyq modelderden ereksheligi bar jeńil avtomobılder bolsa, T3 – jeńil avtomobılder.
«Rallı Qazaqstan-2018» jarysyna FIA Álem kýbogynyń kóshbasshysy Iаkýb Pshıgonskı, Dakar chempıony fransııalyq Lıýk Alfand, Africa Eco Race-2018 Rallı Reıd jeńimpazy reseılik shabandoz Vladımır Vasılev, bıyl ótken Abý Dabı Álem kýbogy kezeńiniń jeńimpazy chehııalyq Martın Prokop, sondaı-aq rallı Qazaqstan kezeńiniń jáne Álem kýbogynyń 2017 jylǵy ıegeri avtoshabandoz Katar Naser Saleh ál-Attııa syndy tájirıbeli de tanymal sportshylar qatysady.
– Bıylǵy rallıdiń baǵytyna ózgerister engizý úshin kóp eńbektendik. Avtosport álemindegi tanymal sport túriniń biri jáne jurtshylyqtyń, ásirese jastardyń qyzyǵýshylyǵyna ıe – rallıdiń «oıly-qyrly» Mańǵystaý jerinde ótip jatqanyna óte qýanyshtymyz. Mańǵystaýdyń keremet peızajdary jáne biregeı tabıǵı keshenderi barlyq deńgeıdegi qatysýshylarǵa kúrdeli synaq jasaı alatyn bolady, – dedi AMSF prezıdenti Marat Ábiqaev.
Dala tósin quıyndata júıtkir temir tulparlar men olardy tizgindegen erlerge mańǵystaýlyqtar aq jol tilep jolǵa saldy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
