Ortalyqtyń saltanatty tusaýkeser rásimine partııanyń oblystyq fılıaly tóraǵasynyń birinshi orynbasary Qadısha Ospanova men Shahtınsk qalalyq fılıalynyń tóraǵasy ári osy shahardyń ákimi Serjan Aımaqov, qala basshylyǵy, jergilikti máslıhat depýtattary, «Jas Otan» jastar qanatynyń músheleri, mádenıet qyzmetkerleri men bıznes ókilderi qatysty. Aıta ketý kerek, jańa ortalyqty ashýǵa bıýdjetpen birge jeke demeýshiler de qol ushyn bergen.
El táýelsizdiginiń alǵashqy jyldarynda ashylǵan kitaphananyń qorynda qazir 300 myńǵa jýyq kitap bar eken. Endi munda túrli ádebıettermen, oqý quraldarymen qatar, kez kelgen aqparatty onlaın-rejimde alýǵa múmkindik jasalǵan. Ortalyq ınternet jelisimen, sıfrly tehnologııalarmen, qajetti jıhazdarmen tolyqtaı qamtamasyz etilgen. Kelýshiler úshin munda qajetti aqparat alyp qana qoımaı, ózara oı-pikir, tájirıbe almasýǵa, shyǵarmashylyq eńbekpen aınalysýǵa da múmkindik zor. Bıyl Qaraǵandy oblysynyń kitaphanalarynda osyndaı taǵy 18 ortalyq ashý josparlanǵan.
– Tehnologııalardyń keleshegi zor. Sondyqtan ınnovasııalyq bilim alýǵa múmkindik jasaý – memleket saıasatynyń mańyzdy baǵyttarynyń biri. «Qazaqstan kitaphanalary – zamanaýı bilim ortalyqtary» jobasynyń sheńberinde qazir elimizde kitaphanalar osyndaı ýaqyt talabyna saı bilim ortalyqtaryna aınaldyrylyp, tıisinshe jabdyqtalyp, elektrondy úlgige kóshirilýde, – deıdi Qadısha Ospanova.
Bul ortalyq kitaptyń, túrli ádebıetterdiń qadirin arttyryp, kópshiliktiń óz ýaqytyn tıimdi paıdalanýyna mol septigin tıgizeri sózsiz. Tehnologııalyq jetistikterdi adam ıgiligine tıimdi paıdalanýdyń bir úlgisi de osy bolmaq.
Qaırat ÁBILDA,
«Egemen Qazaqstan»
QARAǴANDY
