Joba aıasynda osy jyldyń shilde aıynan bastap qaladaǵy 2070 qoqys alańdaryna arnaıy 6 275 konteıner qoıylady. Osylaısha, shahar turǵyndary «sary» jáne «jasyl» tústi konteınerlerge turmystyq qaldyqtardy suryptap tastaıdy. Aıtalyq «sary» konteınerge qaıta óńdeýge jaramdy: metall, plastık, qaǵaz, shyny qaldyqtary tastalsa, jasyl konteınerge tamaq qaldyqtary, organıkalyq jáne basqa da óńdeýge kelmeıtin qaldyqtar salynbaq. Qoǵamdyq mańyzy bar bastamalardy damytý qory tóraǵasynyń orynbasary Tatıana Nemsannyń aıtýynsha, úıdegi qoqysty syrtqa kóbine balalar shyǵaratyndyqtan, sharany uıymdastyrýda olardy atalǵan jobamen tanystyrý, tazalyqqa baýlýǵa basa nazar aýdaryldy. Elorda jastary ekologııalyq mádenıetti nasıhattaýshy, tazalyq qozǵalysynyń bastaýshysy bolýy úshin qala mektepterindegi ustazdarǵa arnalǵan sheberlik dáristeri de ótkizildi. Al Slean Taxi áleýmettik jobasynyń jetekshisi Orazgúl Esdáýletovanyń aıtýynsha, aldaǵy ýaqytta elorda turǵyndary isten shyqqan turmystyq tehnıkany, eski telefon men kompıýterdi jańa taksı qyzmetine ótkizý arqyly ýaqyty men aqshasyn únemdeı alady. Tegin taksı tozyǵy jetken tehnıkalardy óńdeý oryndaryna jetkizedi. Buǵan qosa, turmystyq qaldyqtardy ótkizýden túsken paıda, áleýmettik álsiz toptarǵa jańa jumys ornyn ashýǵa múmkindik bermek. Barlyq jınalǵan qaldyqtar áleýmettik álsiz toptardyń kómegimen óńdeledi. Pılottyq joba ázirshe Astana qalasynda qolǵa alyndy. Eger joba sátti júzege assa, bul jumysty Qazaqstannyń iri qalalarynda da júrgizemiz, deıdi Slean Taxi áleýmettik jobasynyń jetekshisi. Aıta keterligi, ekologııalyq jármeńkede jınalǵan turmystyq qaldyqtardy 10-nan astam qoqys óńdeýshi kompanııa qaıta óńdeýden ótkizbek.
Jyl saıyn Qazaqstanda 5,5 mıllıon tonnadan astam qatty turmystyq qaldyq jınalsa, elordada bir jylda 300 myń tonna qaldyq shyǵarylady. Bul degenimiz qaladan kúnine 1 myń tonnaǵa jýyq qaldyq shyǵady degen sóz. Osy rette qaldyqty bólek jınaý arqyly qoqys polıgonyna túsetin kólemdi azaıtýǵa bolady. Bul óz kezeginde tabıǵı resýrstyń únemdelip, elimizde qaıta óńdeý salasynyń damýyna jol ashpaq. Tipti keler jyldyń kúzinde Astanada qaldyq óńdeıtin keshendi zaýyt iske qosylady degen jospar bar. Atalǵan kásiporyn organıkalyq qoqysty tolyǵymen óńdep, bıogaz jáne keı tyńaıtqysh túrlerin shyǵarýǵa basymdyq beredi.
Erkejan AITQAZY,
«Egemen Qazaqstan»
