Foto: avtor
Ol Astana qalasynyń 20 jyldyq mereıtoıy men Shákárim Qudaberdiulynyń 160 jyldyǵy qurmetine arnaldy. Baıqaýǵa oblystyń ár aýdandarynan kelgen 13 kelin qatysty. Jıyndy aýdan ákimi Jarqynbek Baısabyrov ashyp, qazaqtyń salt-dástúrleri osylaısha nasıhattalyp jatqanyna erekshe rızashylyǵyn bildirdi. Saıystyń bas uıymdastyrýshysy Shyǵys Qazaqstan oblystyq jastar resýrstyq ortalyǵynyń dırektory Araılym Esimbekova qatysýshylarǵa qoıylatyn talaptardy túsindirip, qazylar alqasynyń múshelerimen tanystyrdy.
Oblystyq baıqaýdyń birinshi bólimi «As – adamnyń arqaýy» dep atalǵandyqtan, kelinderge arnap dalada qos aqshańqan kıiz úı tigildi. Aýlada qazan-oshaq pen 13 samaýryn tizilip qoıyldy. Qos kıiz úıdiń birinde kelinder úıden pisirip ákelgen qazaqtyń ulttyq taǵamdarynan dastarqan ázirlendi. Onyń baǵasyn qazylar anyqtap jatty. Ekinshi kıiz úıde baýyrsaq pisirip, ónerlerin kórsetý úshin kelinder iske kiristi. Samaýrynnan sút qosqan shaı demdep, quıyp berý de, ony izetpen usyný da kelinderdiń moınyna túsken bir syn boldy. Baýyrsaqty pisirýden Zaısan aýdanynan kelgen Aınur Kakeeva alǵa ozyp shyqty. Budan soń ár kelin óz qoldarynan shyqqan ulttyq taǵamdardy tanystyrdy.
– Ár eldiń salty basqa demekshi, kelinderdiń barlyǵy bir oblystan bolsa da, tipti aýdandardyń ishinde umytylyp bara jatqan ásip, bylamyq, jonqýyrdaq sııaqty ulttyq taǵamdardy daıyndap, jurtshylyqty tańǵaldyrdy, dedi ShQO máslıhaty qoǵamdyq qabyldaý bóliminiń jetekshisi Bulbul Bakınova.
Budan soń saıys Mádenıet úıiniń konsert zalynda jalǵasty. Bul bólimde kelinder boıyndaǵy aqyl-oı, parasattylyǵyn pash etti. Sonymen «Aıaýly jas kelin-2018» baıqaýy máresine jetip, barlyq qatysýshylarǵa Abaı aýdany ákiminiń jeke ataýly syılyǵy tabystaldy. Bas júlde «Aıaýly jas kelin-2018» ataǵyn zaısandyq Aınur Kakeeva jeńip alyp, 100 000 teńge qarjylaı marapatqa ıe boldy.
Raýshan NUǴMANBEK,
jýrnalıst
Shyǵys Qazaqstan oblysy,
Abaı aýdany
