Is-sharada óńirimizdegi muqtaj, az qamtylǵan, múmkindigi shekteýli azamattaryna erikti túrde qol ushyn berip júrgen 16 adamǵa syı-qurmet kórsetildi. «Nur Otan» Mańǵystaý oblystyq fılıaly tóraǵanyń birinshi orynbasary Nurı Týmyshev eriktiler tobyna jyly lebizin aıtyp, alǵys bildirdi.
- Sizderdiń azamattarǵa kórsetken shynaıy qamqorlyǵyńyz ben elimizdiń áleýmettik máselesine qosqan úlesińizdi, Otan aldyndaǵy patrıottyqtyń belgisi dep bilemiz. «Patrıotızm – kindik qanyń tamǵan jerine, ósken aýylyńa, qalań men óńirińe, ıaǵnı týǵan jerińe degen súıispenshilikten bastalady» dep Elbasy Nursultan Nazarbaev atap ótken bolatyn. Biz «Bolashaqqa baǵdar: Rýhanı jańǵyrý» baǵdarlamasynyń jańǵyrý jolyndaǵy jastarǵa rýh pen jiger beretin, ózge jastarǵa úlgi bolatyn qadamdaryńyzdy qurmetteımiz!-dedi ol.
«Aqtaý qaıyrymdy jandar» tobynyń jetekshisi Túrkmenbaeva Naǵıma Tórebaıqyzy eriktiler tobynyń maqsaty jóninde atqarylyp otyrǵan sharalar jóninde aıtyp berdi.
- Qaıyrymdylyq tobynyń basty maqsaty elimizde qarttar úıi men jetim balalar úıiniń bolmaýyn, qoǵamda az qamtylǵan otbasylardyń sanyn azaıtyp, adamdar arasynda syılastyq, kishipeıildilik ornatý. О́z jumysymyzdy osydan eki jyl buryn, ıaǵnı 2016 jyldyń kúzinde bastadyq. Eriktiler tobynda ár túrli jastaǵy azamattar, kásipkerler, stýdentter, analar bar. Bizder osy ýaqytqa deıin otasyna qarjy talap etiletin balalarǵa, baspanasy joq otbasylarǵa, mektep jasyndaǵy balalardyń kıimderin bútindeýge kúsh jumsap kelemiz. Máselen, Jetibaıda kólik apatyna túsken balanyń 4-5 otasyna jetetindeı etip, 10 kúnniń ishinde 4,5 mln. teńge jınap berdik. Osyndaı balalardyń saýyǵýyna qarajat bólip, olardyń tolyq jazylyp ketýin baqylap otyramyz. Mújálsiz otbasylardan shyqqan balalarǵa arnap «Armanyń oryndalsyn balaqaı!» atty aksııa uıymdastyryp, mektepke baratyn kerekti zattarmen qamtamasyz ettik. Olardyń tizimin meshitten jáne jumyspen qamtý ortalyǵynan alamyz. Onymen qosa múmkindigi shekteýli balalar tasada qalmasyn dep «Juldyzdy sát» degen shara ótkizdik. Onda balalar óz ónerlerin ortaǵa salady,- degen Naǵıma Túrkmenbaıqyzy bolashaq josparlarymen de bólisti.
«Aqtaý qaıyrymdy jandar» tóraıymy toptyń aǵymdaǵy jyldyń tamyz aıynda Túrkistan qalasynda ótetin sletke qatysyp, respýblıka kóleminde qaıyrymdylyq sharalaryn uıymdastyratynyn aıtty.
Gúlaıym ShYNTEMIRQYZY,
«Egemen Qazaqstan»
