Astekter elinen keletin 23 fýtbolshynyń arasynan Rafael Markesti erekshe atap ótýge bolady. 39 jastaǵy jartylaı qorǵaýshy kezinde Fransııanyń «Monako» jáne Ispanııanyń «Barselona» klýbtarynda oınap, atalmysh komandalar sapynda talaı tolaǵaı tabysqa qol jetkizdi. Sonymen qatar, Markes 2002, 2006, 2010 jáne 2014 jyldar jalaýy jelbiregen álem chempıonattarynda sheberligimen kózge tústi. Sol baıraqty básekelerge ol jaı ǵana qatysyp qoımaı, komanda kapıtany retinde óz áriptesterin jasyl alańǵa shyǵardy. Endi Rafael Markestiń esimi dúnıejúzilik dop dodasynda bes márte óner kórsetken oıynshy retinde sporttyq shejirege altyn áriptermen jazylmaq. Al fýtbol tarıhynda dál sondaı qurmetke bólengen nebary tórt-aq adam bar!
Bul kóshti dańqty Antonıo Karbahal bastap tur. Ol 1950, 1957, 1958, 1962 jáne 1966 jyldary ótken álem chempıonattarynda Meksıka quramasynyń qaqpasyn qorǵady. Ekinshisi – Lotar Matteýs. Germanııanyń maqtanyshy 1982, 1986, 1990, 1992 jáne 1998 jyldary ótken jarystarda jasyl alańda jasyndaı jarqyrady. Úshinshisi – Djanlýıdjı Býffon. Áıgili qaqpashy 1998, 2002, 2006, 2010 jáne 2014 jyldary óner kórsetti. Býffonnyń Reseıdegi dodaǵa qatysýǵa da nıeti boldy. Alaıda sheshýshi tusta Shvesııaǵa jol bergen Italııa quramasy tórtjyldyqtyń basty jarysynyń joldamasynan qaǵyldy.
Ǵalym SÚLEIMEN,
«Egemen Qazaqstan»
