Mańǵystaý oblysy tehnıkalyq retteý jáne metrologııa, kásipkerlik jáne saýda basqarmasy, ádilet departamenti, jastar saıasaty máseleleri jáne ındýstrııalyq-ınnovasııalyq damý basqarmalary jańa jas mamandarmen tolyqty.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti basshysy, Ádep jónindegi keńes tóraıymy Nurgúl Jannazarova halyq aldynda saltanatty jaǵdaıda ant qabyldaǵan memlekettik qyzmetshilerge qyzmettik kýálikterin tabys etip, adal qyzmet etýge shaqyrdy jáne jastarǵa sáttilik tiledi.
Memlekettik qyzmetshilerdiń qataryn toltyrǵandardyń biri – Shoqan Seıilhanov. Mańǵystaý oblysy ádilet departamentine jumysqa turǵan ol, adal qyzmeti arqyly memleket múddesin qorǵaýǵa daıyn ekendigin jetkizdi.
-Bul meniń ómirimdegi erekshe kún boldy. Saltanatty túrde ant etip, Ádep jónindegi keńes tóraıymynyń qolynan qyzmettik kýálik aldym. Memlekettik qyzmetke turý úshin birneshe satydan ótýge týra keldi. Bastysy testten súrinbeı óttim. Ata-anam adal bolýǵa úıretti, endigi jerde elimizdiń damýy jolynda aıanbaı ter tógýge daıynmyn, dedi Shoqan Kósherbaıuly.
Oblystyq isshki saıasat basqarmasynyń uıymdastyrýymen ótken sharanyń maqsaty – jastardy ultyn súıýge, memlekettik rámizderdi qurmetteýge tárbıeleý. Bokstan London jáne Rıo olımpıadasy oıyndarynyń júldegeri Ádilbek Nııazymbetovtyń qatysýymen avtosherý uıymdastyrylyp, sońy konsertke ulasqan saltanatty jıynǵa oblys ákiminiń birinshi orynbasary Serik Amanǵalıev, máslıhat depýtattary, jergilikti atqarýshy organ basshylary, etnomádenı birlestikter men jastar uıymdarynyń ókilderi, stýdentter men mektep oqýshylary qatysty.
Jastardy patrıottyq sezimge, ultjandylyqqa jáne QR Memlekettik rámizderin qurmetteýge tárbıeleý maqsatynda uıymdastyrylǵan aksııa sońy oblystyq fılarmonııa ónerpazdarynyń konsertine ulasty.
Gúlaıym ShYNTEMIRQYZY,
«Egemen Qazaqstan»
