Bul kúnde elimizdegi jumys kúshi tapshy óńirlerdi jumys kúshimen qamtamasyz etý úshin qolǵa alynǵan baǵdarlamanyń buqaraǵa bereri kóp. Ári atalǵan baǵdarlamada óz erkimen qonys aýdarýǵa járdemdesý esebinen aýmaqtyq yntalandyrý da qarastyrylǵan. О́tken jyly osy baǵytta josparly sharalardyń qolǵa alynýy nátıjesinde Jambyl oblysynan 54 otbasy elimizdiń soltústik oblystaryna qonys aýdaryp, eńbekke qabiletti otbasy músheleri tegis jumyspen qamtylǵan edi. Bul kúnde Áýlıeata óńirinen soltústikke jáne shyǵysqa qonys aýdarǵan azamattar sol óńirlerde ómir súrýde.
Jalpy, elimizdiń soltústik óńirleri bıyl da ońtústikten keler kóshti qarsy alýǵa ázir eken. Jýyrda ǵana Taraz qalasynda ótken óńiraralyq jármeńkede Qostanaı jáne Pavlodar oblystarynyń ókilderi jambyldyqtarǵa bos jumys oryndaryn usynǵan bolatyn. Bul oraıda oblys ákiminiń birinshi orynbasary Bekbolat Orynbekovtiń aıtýynsha, eńbek resýrstarynyń utqyrlyǵyn arttyrý kózdelgen.
«Bir sózben aıtqanda, eńbek naryǵyndaǵy suranysy óte joǵary soltústik jáne shyǵys óńirlerin jumys kúshimen qamtamasyz etý joldary qarastyrylǵan. Bos jumys oryndaryna básekelestik joǵary aımaqtardan, ıaǵnı halqy tyǵyz qonystanǵan Almaty, Ońtústik Qazaqstan, Mańǵystaý jáne Jambyl oblystarynan turǵyndar soltústikke kóship barsa, olarǵa tıisti áleýmettik paketter berý, baspanamen qamtý, jumysqa ornalastyrý máselesi tolyq qarastyrylǵan.
Byltyr soltústik oblystarǵa 54 jambyldyq otbasy qonys aýdarsa, bıyl 34 otbasy – 159 adam kóship bardy. Qazir olardyń eńbekke qabilettileri júz paıyz jumyspen qamtylǵan», deıdi ákimniń birinshi orynbasary. Al oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetinshe, aǵymdaǵy jyly Qordaı aýdanynan 17 otbasy, 78 adam, Shý aýdanynan 3 otbasy, 9 adam, Baızaqtan 1 otbasy, 4 adam, Tarazdan 4 otbasy, 23 adam jáne Merki aýdanynan 2 otbasy, 12 adam, sonymen qatar Talas aýdanynan 1 otbasy, 3 adam, Jýaly aýdanynan 1 otbasy, 6 adam ózge óńirlerge qonys aýdarǵan. Olarǵa tıisinshe múmkindikter de qarastyrylǵan.
Atalǵan basqarmanyń kóshi-qon bóliminiń basshysy Aıjan Álimbekovanyń aıtýynsha, elimizdiń soltústik oblystaryna qonys aýdarǵan otbasylardyń báriniń bul kúnde jaǵdaıy jaqsy. Áleýmettik qorǵaýdyń áleýetin sezinip otyrǵan azamattar laıyqty jumysqa ornalasyp, kún keshýde. Máselen, Soltústik Qazaqstan oblysyna Jambyl óńirinen 27 otbasy kóship barǵan eken. Jıyny 126 adamdy quraıtyn otbasy músheleri Soltústik Qazaqstan oblysynyń Qyzyljar, M.Jumabaev, Mamlıýt, Aqqaıyń, Taıynsha, Shal aqyn jáne Jambyl aýdandarynyń eldi mekenderine qonystanyp, jeke qarajat esebinen turǵyn úımen qamtylypty. Jáne otbasy ıeleri munda «Naýryz 2030», «Andreevka» JShS, «Býlaevskıı elevator» AQ, sondaı-aq «Vıktorııa» sharýa qojalyqtaryna jumysqa ornalasqan. Sonymen qatar Pavlodar oblysyna 5 otbasy, 22 adam qonys aýdarǵan eken. Jambyl óńirinen qonys aýdarǵan azamattar Pavlodar, Ekibastuz qalalaryna jáne Lebıaji aýdanyna qonystanǵan. Munda da qonys aýdarýshy azamattar jaldyq turǵyn úımen qamtylyp, otbasy basshylary «Qazaqstandyq vagon qurylys kompanııasy», «Promservıs Otan» JShS-ǵa jumysqa ornalasypty. Al Shyǵys Qazaqstan oblysynyń Katonqaraǵaı jáne Shemonaıha aýdandaryna bıyl 11 adamnan quralǵan áýlıeatalyq 2 otbasy qonys aýdarypty. Taraz qalasynan jáne Baızaq aýdanynan kelgen otbasylar jaldyq turǵyn úımen jáne jumyspen qamtylǵan eken.
Árbir azamattyń nesibesi – kásibinde. Bul oraıda ózge óńirlerge qonys aýdarǵan jambyldyqtardyń sol jerde kásibin ashýǵa da múmkindigi bar ekenin aıta ketken jón. Tipti jýyrda ótken soltústik oblystar tarapynan usynylǵan bos oryndar jármeńkesinde talapkerlerge tıisti málimettiń bári berilip, mán-jaı túsindirilgen edi. Sondyqtan da bıyl soltústik óńirlerge qonys aýdarýshylardyń kórsetkishi arta túsýi múmkin.
Osy ýaqytqa deıin Jambyl oblysynyń Qordaı aýdany Qordaı aýylynda turyp kelgen Jarylǵasynovtar otbasy bıyl Soltústik Qazaqstan oblysy Jambyl aýdany Arhangelsk aýylyna qonys aýdarypty.
Otaǵasy Sábıt Jarylǵasynov sol aýyldaǵy egistik jumystaryna atsalysyp, jumys atqarǵan. Tipti úsh bólmeli pátermen qosa, baǵdarlama sheńberindegi qarajatyn da alyp úlgeripti. Alaıda jubaıy Janna Ámetovanyń aıtýynsha, Arhangelsk aýylynda qazaqtildi mektep joq eken. Sondyqtan da qazaq tilinde bilim alyp júrgen balalardyń birden orys mektepte oqýy ońaıǵa túspeıdi. Endi balalarynyń qazaq tilinde bilim alýy úshin Jarylǵasynovtar otbasy oblystyń Tımırıazev aýdany, Dzerjınskıı aýylyna kóshipti. Janna Ámetova jubaıy Sábıt Jarylǵasynovtyń sol mektepke jumysqa ornalasqanyn jetkizdi. Endigi jerde bul otbasy sol jerden shaǵyn bolsa da kásip bastap, tirligin tikteý úshin jumys isteýge daıyn.
Aıta keteıik, Taraz qalasynda ótken bos jumys oryndary jármeńkesinde soltústik oblystar tarapynan turǵyndar nazaryna mamandyq túrleri boıynsha bos jumys oryndary men kóshýge bolatyn aýmaqtar usynylǵan edi. Bul rette jumys berýshilerdiń de talaptary men usynystary tyńdalǵan bolatyn. Máselen ár aýdannan kelgen turǵyndar tıisti mamandarmen keńesip, ózge óńirlerge qonys aýdarýǵa qyzyǵýshylyq tanytqan edi. Tipti turǵyndarǵa qajetti qujattar tizbesi men telefon nómirleri jazylǵan paraqshalar da taratylǵan bolatyn. Al jármeńkege kelgen Taraz qalasynyń turǵyny Aıgúl Mansurova soltústik óńirlerge kóship baryp, sol jaqta óziniń kásibin ashqysy keletinin aıtty. «Mamandyǵym muǵalim bolǵanymen, qosymsha kásiptik bilim aldym. Sondyqtan da soltústik jaqqa kóship baryp, sol jaqta kásibimdi ashsam deımin. Bul baǵdarlama sheńberinde qandaı múmkindikter beriletinin bir tanysym aıtqan edi. Ol otbasymen ótken jyly Qostanaı oblysyna kóship ketken. Qazir de habarlasyp turamyz. Jumysqa ornalasypty, tıisti kómekter túgel kórsetilipti. Jaǵdaılary da jaqsy eken. Endi men de otbasymmen soltústikke qaraı kóshsem deımin», deıdi ol. Jármeńkege kelgen azamattardyń kópshiligi ózge óńirlerge qonys aýdarý máselesine qyzyǵýshylyq tanytyp jatty.
Jalpy, kóshtiń qazaq uǵymynda úlken mańyzǵa ıe ekeni belgili. Adamdardyń taǵdyry, armany men úmiti de kóshtiń qaltarysynda qalmaı, alǵa shyǵýy shart. Alaıda búgingideı beıbit zamanda Alataýdan bastalyp, Altaı men Arqaǵa aıaldaǵan kóshtiń mazmuny erek. Elimizde qolǵa alynǵan «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» sheńberinde turǵyndardy ońtústikten soltústikke kóshirý máselesi táýelsiz el tarıhyndaǵy taǵy bir beles, salıqaly saıasat. Al Qarataýdyń basynan qulaǵan kósh baǵzydaǵydaı «Elim-aılap» emes, egemen elimizdiń erekshe bastamalaryna qoldaý bolyp tabylady. Atyraý – Arqa, Alataý – Altaı, qazaqtyń tórt qubylasy. Jerdiń jattyǵy, eldiń bótendigi joq. Mundaıda qazaqtyń «Kósh kólikti, is ónikti bolsyn!» deıtini bar...
Hamıt ESAMAN,
«Egemen Qazaqstan»
Jambyl oblysy
