Úlken Sulýtór aýyly negizinen aýdan ortalyǵynan asa qashyq bolmaǵanymen, oblys ortalyǵynan úsh júz shaqyrymnan astam shalǵaı jerde ornalasqan. О́zine tán tereń tebirenisti tabıǵaty bar. Keıde aýyldyń taǵdyryn qalyptastyrýda, sondaǵy ahýaldy jaqsy saqtaýda erekshe eńbek etken azamattar bolady. Olar qaı salanyń mamany bolsa da, qashanda sol aýyldyń asqaqtap, abyroıly bolýyna tilekshi. Dáriger Ǵaını Aqylqojaeva otyz úsh jyl boıy Úlken Sulýtór aýylynda eńbek etip keledi. Keńes zamanynda bul aýylda 40 naýqasqa arnalǵan jatyn orny bar aýrýhana bolǵan. 1985 jyly Almaty qalasyndaǵy medısına ınstıtýtyn bitirip kelgen jas maman osy aýrýhanaǵa jumysqa ornalasady. Keıipkerimizdiń bala kúnnen bergi armany otandyq medısına salasynda qyzmet etý bolǵan eken. Mine, ol otyz jyldan astam ýaqyt boıy taban aýdarmastan osy aýylda eńbek etýde. Bul kúnde Úlken Sulýtór aýylynda 7 pasıentke arnalǵan dárigerlik ambýlatorııa jumys isteıdi. Quramyna Sulýtór, Kóktóbe jáne Belashov eldi mekenderi kiretin Úlken Sulýtór aımaǵynda 2 300 shamasynda halyq turady. El bolǵan soń bas aýyryp, baltyr syzdaıtyn jaǵdaılar bolady ǵoı. Sondaı kezde turǵyndardyń janyna jalaý, kóńiline medeý bolyp otyrǵan Ǵaını Aqylqojaeva Gıppokrat antyna adal jan ekenin dáleldep keledi. Jalǵyz ózi bútin bir aýyldyń turǵyndarynyń densaýlyq jaǵdaıyn qadaǵalap, qolynan kelgen kómegin berip otyr.
Dárigerdiń aıtýynsha, aýyldyqtar negizinen dárigerlik ambýlatorııaǵa qan qysymy dertimen jıi qaıyrylady eken. «Úlken Sulýtór aýylynda 2 myńnan astam halyq turady. Sonymen qatar munda Qytaıdan kóship kelgen qandastarymyz da bar. Turǵyndardyń jaǵdaıynyń bári maǵan belgili. Olar da kómek qajet kezinde kúndiz bolsa da, túnde bolsa da maǵan habarlasady. Tipti aıaǵy aýyr áıelderdiń jolda bosanyp qalý jaǵdaılary da kezdesedi. Árıne, adam ómirine qaýip tóngen sátterge de kýá boldyq. Ondaı kezde qolymnan kelgen alǵashqy kómekti jasaımyn. Bala kúnimnen dáriger bolýdy, iri densaýlyq saqtaý ortalyqtarynda jumys isteýdi armandadym. Otyz jyldan astam dárigerlik tájirıbemde tek halyqtyń alǵysyn alyp kelemin», deıdi keıipkerimiz.
Aýylda jedel járdem kóligi bolmaǵanymen, sanıtarlyq kólik bar. Bul árıne táýliktiń kez kelgen ýaqytynda naýqas turǵyndardy tıisti jerge jetkizýge septigin tıgizedi. Al ambýlatorııaǵa qosymsha qyzmetker qabyldaý úshin turǵyndar sany jetkiliksiz. Sondaı-aq alys aýyl bolǵandyqtan da jas mamandar munda kelip jumys isteýge qulshynys tanytpaıdy.
Ǵaını Qapasbekqyzy aýyl turǵyndarynyń densaýlyǵyna jaýapty ekenin kúndelikti jumys barysynda kórsetip kele jatqan maman. Kún sýytyp, qys mezgili jaqyndaǵanda dárigerlik ambýlatorııany jylytý da osy azamattyń mindeti bolyp ketken. Ol dárigerlik qyzmetimen qatar, kún sýyta bastaǵanda otyn daıyndaý máselesimen de aınalysady. Sonymen qatar talaı ýaqyttan beri atalǵan densaýlyq saqtaý nysanynda kómir jaǵyp kúneltken kúnderi bar. Gıppokrat antyna adal aq halatty abzal jan munyń bárin de óziniń mindeti retinde qaltqysyz oryndaıdy. Ol úshin eń birinshi kezekte halyqtyń densaýlyǵy, ult saýlyǵy turady. Sondyqtan da talaı jyldan beri eńbek demalysynda tolyq tynyǵyp, demalyp kórgen emes. Tutas bir aýyl turǵyndarynyń densaýlyq saqtaý máselesine jaýapty Ǵaını Aqylqojaeva úshin bul úırenshikti jaǵdaı bolyp ketken. «Eńbek demalysy turmaq, táýliktiń árbir sátinde tynym bolmaıdy. El ishi bolǵan soń adamdar aýyryp qalýy múmkin. Sondaı-aq basqa da jaǵdaılar bolady. Sol úshin dáriger barlyq ýaqytta kómek kórsetýge daıyn bolýy kerek», deıdi ol.
Hamıt ESAMAN,
«Egemen Qazaqstan»
Jambyl oblysy,
Qordaı aýdany,
Sulýtór aýyly
