Jobanyń maqsaty jaıly kópshilikti habardar etken Astana qalasy ákiminiń orynbasary Ermek Amanshaev, alda kele jatqan elorda kúni qarsańynda asa aýqymdy mádenı sharalar josparlanyp jatqanyn aıta otyryp, solardyń ishinde mańyzdysy búgingi kórme ekenin jetkizdi.
Úsh kezekpen ótkizilýi tıis atalmysh mádenı jobanyń bul jolǵy betashary retinde – Soltústik Qazaqstan, Aqmola oblystarynyń jáne Qaraǵandy óńirine qarasty «Ulytaý» ulttyq tarıhı-mádenı jáne tabıǵı qoryq-mýzeı jádigerleri ákelinipti.
Osylardyń ishinde qyzyljarlyqtar usynǵan «Ultyn súıgen uly júrek» atty kórme negizinen kórnekti aqyn Maǵjan Jumabaevtyń ómiri men shyǵarmashylyǵyna arnalǵan eken. Iаǵnı 90-ǵa jýyq jádigerlerdiń arasynda, aqynnyń atasy Jumabaıdyń qurany men qajylyq sapary kezinde qoldanǵan jaınamazy, M.Jumabaev aýdany Sarytomar aýylyndaǵy mýzeı qorynan alynǵan aqynnyń jary Zylıqa qoldanǵan ydys-aıaq buıymdar, inisi Sálimjannyń jaryna Maǵjannyń ózi syılaǵan kerlen kese, sonymen qatar Ulttyq mýzeı qorynda turǵan aqynnyń portfeli qatarly tarıhı jádigerlermen qatar, 1912 jyly Tashkentte jaryq kórgen M.Jumabaevtyń «Sholpan» atty týyndysynyń kóshirmesi men 1923 jyly shyqqan «Izbrannoe» kitaby sııaqty qundy dúnıelerdi kórip sanamyzdy jańǵyrttyq.
Kelesi kórme ıesi aqmolalyqtar sharaǵa arnap 150 eksponat ákelipti. Osynyń 50-shaqtysy etnogafııalyq (qusbegi jabdyǵy, at ábzelderi t.b.) buıymdar eken. Oblystyq tarıhı-ólketaný mýzeıiniń basshysy Qýanysh Shaqshaqovtyń málimetine súıensek, joǵarydaǵy jádigerler óńirdegi barlyq mýzeı qorynan jınalǵan. Bulardyń arasynda aıryqsha atap óterlik dúnıe aqyn-sazger, bostandyq kúreskeri Imanjúsip Qutpanulynyń besatary. Bul dúnıe qazir elorda irgesindegi «Jibek joly» aýylynyń turǵyny Imekeńniń nemeresi Raýshan Nurqanqyzynyń qolynda tur.
Sonymen qatar óńirge aty málim oqymysty-aǵartýshy Musabaı Zilqaraulynyń shaǵataı tilinde jazylǵan kitaby, Raǵbýzıdyń ózbek tilindegi «Hıssaýl Ánbııasy», 1902 jyly Qazan qalasynda jaryq kórgen dinı saryndy «Hısaıatýl» jyr kitaby, ásirese qundy mura retinde tanymal Qoja Ahmet Iаsaýıdiń «Dıýanı hıkmet» qoljazbasynyń tupnusqasy sekildi kóne jádigerler kórme sóresinen oryn alypty.
Úshinshi kórme ıesi ulytaýlyqtar jergilikti fotograf Dmıtrıı Rýgıs túsirgen hám óńirdiń kórkem landshaft tabıǵatyn beıneleıtin 35 kartınany kózaıym retinde usynypty.
Mádenıet jáne sport mınıstrliginiń jaýapty hatshysy Qýatjan Ýálıevtiń aıtýynsha, óńirdegi qundy jádigerlerdi tanystyrý isi áli jalǵasady. Betashar retinde usynylyp otyrǵan mundaǵy úsh oblys kórmesi 10 maýsymǵa deıin tursa, kelesi kórme ıesi kerekýlikter isin 16 maýsymda bastap, 22 maýsymda aıaqtaıdy. Úshinshi bolyp Shyǵys Qazaqstan jáne Almaty oblysynyń mýzeıleri 27 maýsym – 7 shilde aralyǵynda jádigerlerin tamashalata alady.
Beken QAIRATULY,
«Egemen Qazaqstan»
