Tegin túrde uıymdastyrylyp otyrǵan joba Astana qalasy Mádenıet jáne sport basqarmasynyń qoldaýymen úshinshi márte qolǵa alynyp otyr. Jobadaǵy negizgi erekshelik – jeksenbi kúnderi kásipqoı jattyǵýlar tańerteńgi 10:00-12:00 aralyǵynda bolsa, keshkisi 17:00-19:00 aralyǵynda ótkiziledi. Sonymen birge «Astanalyq» jáne «Trıatlon» saıabaǵynda toptyq júgirýden dúısenbi, sársenbi jáne juma kúnderi saǵat 19:30-dan 20:30-ǵa deıin sabaqtar ótkiziledi.
Jeksenbi kúni «Astanalyq» saıabaǵynda tańerteńgilik jattyǵý túrine krossfıt, zýmba, ıoga, toptyq júgirý jáne brazılııalyq djıý-djıtsý kiredi. Qazirgi tańda álemde sporttyń krossfıt túrimen aınalysýshylar sany ýaqyt ótken saıyn artyp keledi. Sebebi onda júgirýden bastap aýyr atletıka, paýerlıftıng, gımnastıka sııaqty dene jattyǵýlarynyń barlyǵy qamtylǵan. Brazılııalyq djıý-djıtsý óneri jekpe-jek túri bolǵandyqtan, sporttyq keshenderde oǵan qatysý aqyly túrde bolady. Al saıabaqtaǵy sabaqtar tegin.
Saıabaqtaǵy keshki baǵdarlamaǵa shahmat, doıby jáne Street Workout, júgirý, strıtbol sııaqty toptyq oıyndar men balalarǵa arnalǵan oıyn-saýyq túrleri de engizilip otyr.
Krossfıt, zýmba, ıoga jáne brazılııalyq djıý-djıtsý baǵyttaryna «Prezıdenttik», «Stýdenttik» jáne «Jeruıyq» saıabaqtaryna jeksenbi kúnderi tańǵy ýaqytta baryp qatysa alady, al keshki ýaqytta «Prezıdenttik» parkten basqa saıabaqtarda ústel oıyndary oınalady.
«Trıatlon» parkinde jeksenbi saıyn tańerteń jáne keshke toptyq jattyǵýlar ótedi.
Bul qolǵa alynyp otyrǵan Fitness Park Astana jobasy 27 mamyrdan 9 qyrkúıekke deıin Astana saıabaqtarynda ár jeksenbi saıyn ótkiziledi.
Azamat MÁÝLENULY
