Qazaqstan halqy Assambleıasynyń qoldaýymen, Prezıdent janyndaǵy Memlekettik basqarý akademııasynyń oblystyq fılıalynyń uıymdastyrýymen ótip jatqan sharaǵa Qaraǵandy, Pavlodar jáne Shyǵys Qazaqstan oblystarynyń memlekettik qyzmetshileri qatysýda. Semınar barysynda Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýy, «Rýhanı jańǵyrý» baǵdarlamasy men kóshi-qon saıasaty taqyryptary boıynsha otandyq ǵalymdar men sarapshylar, Qazaqstan halqy Assambleıasynyń ókilderi baıandama jasap, oılaryn ortaǵa salatyn bolady.
«Ǵulama ǵalym Ábý Nasyr ál-Farabı: «Adamǵa eń birinshi bilim emes, tárbıe berilýi kerek, tárbıesiz berilgen bilim – adamzattyń qas jaýy», dep bekerge aıtpasa kerek. Sol sebepten balaǵa tárbıe men bilim qatar berilýi tıis. Osyǵan basa nazar aýdarǵanymyz lázim. Bizge kompıýter basty urpaq qajet emes. Keıingi býyn meıirimdi, aqyldy, parasatty bolyp óssin desek, biz olarǵa durys úlgi-ónege kórsete bilýimiz kerek. Sonda ǵana keleshekte el erteńin oılaıtyn bilikti mamandar qalyptastyra alamyz», dedi Qazaqstan halqy Assambleıasy Hatshylyǵy meńgerýshisiniń orynbasary Názıpa Shanaı semınar-trenıngtiń ashylýynda.
Úsh kúnge sozylatyn semınar-trenıngte Prezıdent janyndaǵy Memlekettik basqarý akademııasy Ortalyq Azııa óńirindegi etnosaralyq jáne konfessııaaralyq qatynastardy zertteý ortalyǵy jetekshisiniń orynbasary Dastan Kósherbaev, Ortalyq saılaý komıssııasynyń hatshysy Sabıla Mustafına, Ulttyq ekonomıka mınıstrliginiń ókili Aıaýlym Saǵynbaeva, tarıh ǵylymdarynyń doktory Jambyl Artyqbaev memlekettik qyzmetkerlerge dáris oqıdy dep josparlanǵan.
Azamat QASYM,
«Egemen Qazaqstan»
О́SKEMEN
