Oıynǵa Erkebulan Seıdahmet qatyspaıdy degendi estigen kóptegen kórermen biraz qyzyqtan qur qalyp qoıǵandaı kúı keshti. Qaptal arqyly sytylyp ótip, qarsylastyń qorǵanysyna lap qoıatyn jas daryn jaraqatyna baılanysty alańǵa shyǵa almady. Ol 19 sáýir kúni «Ýfa» komandasynyń oıynynda jaraqat alyp qalǵan edi. Degenmen, onyń ornyna alańǵa shyqqan Erkebulan Tuńǵyshbaev ta táp-táýir óner kórsetti. Al negizgi shabýylshy retinde birinshi mınýttan alańǵa Alekseı Shetkın shyqty.
Buryndary tek ekinshi taımda alańǵa shyǵatyn «Astana» shabýylshysy negizgi quramdaǵy oryndy amalsyzdan alǵan sekildi. Sebebi qazir Sergeı Hıjnıchenko «Ordabasy» sapynda jóndi oınaı almaı júr. Shynyn aıtqanda, komanda ishindegi básekelestikte ol legıonerlerge oryn berip qoıdy. Al Stoılov fýtbolshynyń sińirgen eńbegi men ataq dárejesine múlde qaramaıdy. «Dál qazir kim myqty oınap júr, sonyń barlyǵyn quramaǵa shaqyrdym» degen sózinen esh tanbady. Al qalǵan fýtbolshylardyń barlyǵy óz ornyna jaıǵasty.
Match bastala salysymen Qazaqstan quramasy standarttyq jaǵdaılarǵa kóp kóńil bóldi. 15 mınýttyń ishinde 3 buryshtama kóterip, bir aıyp dobyn oryndady. Sol aıyp dobynan tamasha pas kótergen Baýyrjan Islamhan Roman Murtazaevtyń gol soǵýyna múmkindik jasady. Esep 1:0.
Artynsha ile-shala Islamhan taǵy bir kombınasııalyq shabýyl uıymdastyryp, onyń da nátıjesi golǵa ulasty. Serikjan Mujyqov shabýylǵa núkte qoıyp, esepti eseleı tústi. Aıta keteıik, bul Serikjannyń ulttyq qurama sapyndaǵy alǵashqy goly edi. 16 oıynda soqqan birinshi doby. Jalpy alǵanda Mujyqov Stoılov bapkerdiń syzbasyndaǵy mańyzdy fýtbolshyǵa aınalǵanyn baıqadyq. Ortada Islamhan men Mujyqov juby búkil shabýyldy bastady. Al Islambek Qýat kóbinese qorǵanysqa jaýap berip, qarsylas shabýylyna toıtarys berýmen aınalysty.
Ekinshi taımda da birneshe fýtbolshy almasyp, bolgar bapkeri qyzyqty qadamdarǵa bardy. Álgi Erkebulan Seıdahmet oınaıtyn oń qaptalda óner kórsetken Tuńǵyshbaevty almastyryp, onyń ornyna Georgıı Jýkovty kirgizdi. Biraq «Qaırat» oıynshysy tek ortada ǵana oınaı alady. Al oń qaptalǵa Mujyqov keldi. Biraq saǵatqa jýyq oıyn ótken tusta bapker Serikjandy da demalýǵa jiberip, onyń ornyna Bahtıer Zaınýtdınovty shyǵardy. Jas oıynshy oń qaptalda oınaýǵa májbúr boldy. Áıtpese onyń da negizgi orny ortalyq alań edi. Zaınýtdınovtyń oń qaptalda mardymdy eshteńe bitire almasyn baıqaǵan bapker Islamhandy alyp, ornyna Iаn Voragovskııdi kirgizdi. Sebebi ortada oınaıtyn oıynshylar alańda tórteý bolyp ketti. Al Voragovskıı oń qaptaldyń oıynshysy bolmasa da, shetkeri tusta emin-erkin qımyldaıtyn qasıeti bar. Negizinen ol da sol qaptalda oınaıdy. Ekinshi taımda oń qaptalda tórt fýtbolshy óner kórsetti. Tuńǵyshbav, Mujyqov, Zaınýtdınov, Voragovskıı. Bul árıne ulttyq quramamyzdyń aqaýly tusy degen sóz. Erteńderi resmı oıyn ótkizgen shaqta bulaısha oıynshylardy almastyryp otyrý múmkin emes. Sondyqtan da Qazaqstan quramasyna oń qaptalda oınaıtyn taǵy bir adam kerek degen sóz.
Matchtyń sońǵy mınýtynda Zaınýtdınov gol soǵyp, 3:0 nátıjesin tirkedi. Bul esep «Astana Arenaǵa» jınalǵan 22 myń jankúıerdiń kóńilin odan ári shalqytyp tastady. Jambyl fýtbolynyń ókili óziniń 3 oıynynda 2-golyn soǵyp otyr.
Baqtıer ZAINÝTDINOV,
Qazaqstan quramasynyń oıynshysy:
– Komandadaǵy tájirıbıeli oıynshylar maǵan kóp aqyl aıtyp, únemi qoldap otyrady. Sonyń arqasynda senimdi oınadym. Esepte alǵa shyǵyp turǵan soń, aıaqtaǵy dopty esh oılanbas-
tan qaqpaǵa tebe saldym. Kezekti golymdy soqqanyma rızamyn. Stanımır Stoılov kelgeli beri quramanyń oıyny jandana tústi degen pikirmen tolyq kelisemin.
Stanımır STOILOV, Qazaqstan quramasynyń bas bapkeri:
– Barsha qazaq jankúıerlerin jeńispen quttyqtaımyn. Meniń fýtbolshylarym jaqsy deńgeıde dop tebe alatynyn dáleldedi. Endi 6 qyrkúıekte bolatyn Grýzııaǵa qarsy oıynǵa daıyndalamyz. «Astana Arenada» Ulttar lıgasynyń matchyn jeńispen bastaýymyz kerek. Al oǵan deıin eshqandaı joldastyq match ótpeıtindikten, fýtbolshylardyń eýrokýbokte kórsetetin oıynyna kóp nazar salamyz.
Ermuhamed MÁÝLEN,
«Egemen Qazaqstan»
