Aıtýly doda 2002 jyldan beri úzdiksiz uıymdastyrylyp keledi. Grekııanyń Patry qalasynda ótken tusaýkeser týrnırde Reseı sportshylary top jarsa, odan keıin Nıý-Iork pen Long-Bıchte Vengrııanyń vaterpolshylaryna teń keler eshkim tabylmady. 2005 jáne 2006 jyldary Belgrad pen Afınada jalaýy jelbiregen jarysta Serbııa men Chernogorııa quramalary shashasyna shań juqtyrmady. Keıinnen joǵaryda atalǵan memlekettiń irgesi sógilip, olardyń árqaısysy jeke-jeke komanda jasaqtaıdy. Bul rette de olar nesibesiz bolǵan joq. 2009 jyly Podgorısada ótken doda Chernogorııanyń jeńisimen aıaqtalsa, Serbııanyń sý doby sheberleri toǵyz márte bas júldeni oljalady.
2012 jylǵy Álemdik lıganyń sýperfınaly Almatyda uıymdastyrylǵanyn jankúıerler umyta qoıǵan joq. Osy sport túriniń shoq juldyzdary Alataý baýraıynda alty kún boıy aıqasyp, solardyń arasynan Horvatııa sýyrylyp shyqty. Fınalda horvattar Ispanııadan aılasyn asyrsa, qola medal Italııaǵa buıyrdy. О́kinishke qaraı, barlyq básekede jeńilis tapqan jerlesterimiz Almatydaǵy týrnırdi eń sońǵy orynmen qorytyndylaǵan bolatyn.
Býdapeshte jarys jolyna shyǵatyn komandalardyń barlyǵy da óte myqty. О́zge dodalardy aıtpaǵanda Olımpııa oıyndarynyń ózinde ǵana Vengrııa vaterpolshylary 9 márte jeńimpaz atandy. AQSh, Ispanııa jáne Horvatııa bir-bir retten dál sol tuǵyrdan kórindi. Serbııamen bir týdyń astynda óner kórsetken kezde Chernogorııa kúmis medaldi ıelendi. Aýstralııa men Japonııa Olımpıada men álem chempıonattarynda júlde almaǵanymen, olardyń da qazirgi qarqyny kúshti. Mine, Vengrııada ótetin Álemdik lıganyń sýperfınalynda Qazaqstannyń sý doby sheberlerine osyndaı myqtylarmen aıqasýǵa týra keledi.
Ǵalym SÚLEIMEN,
«Egemen Qazaqstan»
ALMATY
