Jaryq dúnıe esigin 17 mamyr kúni ashqan náreste, árıne ázirge eshteńeden habarsyz. Ata-anasy bastap, jaǵymdy habardan qulaǵdar bolǵan qala turǵyndary qýanyp jatqanda ol typ-tynysh, táp-tátti uıqy qushaǵynda edi. Aısulý bul dúnıege taýdaı baq-bereke, nesibesin ala keldi. Naqtyraq aıtsaq, keshe, ıaǵnı sársenbiniń sátinde mıllıonynshy qala turǵynyna qos bólmeli páter kilti tabys etildi. Páter kiltin saltanatty túrde tabys etken oblys ákimi Janseıit Túımebaev náresteniń deni saý, eline eleýli, halqyna qalaýly qyz bolyp ósýine tilektestigin jetkizdi.
– Elbasy búkil dúnıe júziniń qaıratkerleri qatysqan ekonomıkalyq forýmda Shymkent qalasyn mıllıondy qala dep jarııalady. Al shymkenttikter respýblıkalyq statýs ıelený bastamasyn óte qyzý qarqynmen qoldady. О́tken jyldyń qorytyndysyna sáıkes oblys ortalyǵynyń turǵyndary 39 myń adamǵa ósti. Munyń 18 myńy ishki kóshi-qon esebinen júzege asqan. Al qalanyń mıllıonynshy turǵyny mamyr aıynda dúnıege kelgen bolatyn. Ol azamatsha – Aısulý Elamanova jas otbasynyń birinshi perzenti. Shymkenttikterdiń atynan osy aıtýly oqıǵamen shyn júrekten quttyqtaımyn! – dep oblys ákimi júrekjardy lebizin bildirdi.
Aıta ketelik, bul páterdi óńirge belgili kásipker, mesenat, oblystyq máslıhat depýtaty Qaırat Moldaseıitov syıǵa tartty. «Men Shymkenttiń janashyrymyn. Qalanyń búgini men erteńi meni árqashanda tolǵandyrady. Esterińizde bolsa, buǵan deıin qala ákimi bolyp qyzmet te istedim. Qala mártebesin asqaqtatqan osy sábıge eki bólmeli páter bersem dep sheshtim. Náreste Shymkent qalasymen birge kórkeıip óse bersin dep tileımin. Al ózim qalanyń qarqyndy túrde damıtynyna senimdimin», dedi «Otaý grýpp» kompanııasynyń basshysy Qaırat Moldaseıitov.
Tuńǵyshtarynyń arqasynda páterli bolǵan jas ata-ana Samat Elamanov pen Aıjan Ahaıbekovanyń osyndaı qýanysh syılaǵan oblys, qala ákimdigi men mesenatqa aıtar alǵysy sheksiz. «Qyzymyzben birge alańsyz ósip jatqanbyz. Bizge eń birinshi azamattyq hal aktilerin tirkeý ornynan habarlasty. Olar qyzymyzdyń aty-jónin, salmaǵyn, kýáligin surady. Basynda qyzymyzdyń mıllıonynshy turǵyn bola qoıatynyna senbeı, onsha úmittene qoımadyq. Biraq keshe olar úıge kelip, bizdiń qyzymyzdy mıllıonynshy qala turǵyny bolýymen quttyqtady. Shyny kerek, sonda ne isterimizdi bilmeı abdyrap qaldyq. Qýanyshymyzdy sózben aıtyp jetkizý múmkin emes», deıdi otaǵasy, qaladaǵy júıke aýrýlary aýrýhanasynda meıirger bolyp jumys isteıtin Samat. Al Aısulýdyń anasy Aıjan «Alfa banktiń» qyzmetkeri eken.
Osylaısha, qasıetti Ramazan aıynyń birinshi kúni týǵan Aısulý Shymkent qalasynyń mártebesin ózgertýge tikeleı septigin tıgizip, ata-anasyn qýanyshqa bóledi.
Ǵalymjan ELShIBAI,
«Egemen Qazaqstan»
Ońtústik Qazaqstan oblysy
