Sessııaǵa qatysqan 156 memlekettiń 98-i Qazaqstan kandıdatýrasyna daýys berdi. Elimizdi qoldaǵan kóptegen delegattar qazaq halqynyń baı mádenıeti men dástúrlerin nasıhattaý úshin eńbek etip júrgen Qazaqstan Respýblıkasynyń IýNESKO jáne ISESKO isteri jónindegi Ulttyq komıssııa mamandarynyń kásibı qasıetterin jáne memleketimizdiń joǵary halyqaralyq bedelin atap ótti.
Saılaý qorytyndysymen Qazaqstannyń IýNESKO janyndaǵy Turaqty ókildigi Bas assambleıaǵa qatysýshylarǵa bildirgen senimderi úshin rızashylyq bildirip, ultymyzdyń mádenı murasyn búkil álemge tanytý jumystary Elbasy Nursultan Nazarbaevtyń «Rýhanı jańǵyrý» strategııasynyń mańyzdy mindetteriniń biri bolyp tabylatynyna erekshe toqtady. Sonymen birge, MEMM qorǵaý Komıtetindegi otandyq mamandardyń qyzmeti olardyń kásibı qabilettilikterin nyǵaıtyp, dúnıe júzinde mádenı murany qorǵaýdyń teorııasyna jáne praktıkasyna óz úlesin qosýlaryna múmkindik beredi.
MEMM uǵymy aýyzeki dástúrler jáne mádenıetti tanytýdyń basqa formalaryn, oryndaýshy ónerler, ádet-ǵuryptar men merekeler, tabıǵat jáne ǵalam týraly nanymdar, dástúrli qolónerge qatysty daǵdylardy qamtıdy. Al murany qorǵaý birnishi kezekte ony anyqtaý, qaıta jandandyrý, sıpattaý, zertteý, nasıhattaý jáne kelesi urpaqqa jetkizý úshin jaǵdaı jasaýdy qosa ala onyń jalpy ómirsheńdigin qamtamasyz etý maqsatyn bildiredi. MEMM qorǵaý jóninde Konvensııa 2003 jyly qabyldanyp, osy kúnge deıin 178 memleketpen ratıfıkasııalandy. Konvensııa maqsattaryn 24 memleketten turatyn MEMM qorǵaý jónindegi Komıtet júzege asyrady. О́ziniń jyl saıynǵy basqosýlarynda ol osy saladaǵy halyqaralyq jáne ulttyq deńgeıdegi is-sharalardyń tıimdiligin qarastyrady.
Konvensııanyń negizgi quraldarynyń biri bolyp MEMM boıynsha Reprezentatıvti tizim tabylady. Búginde Qazaqstannyń IýNESKO jáne ISESKO isteri jónindegi Ulttyq komıssııanyń janynda qurylǵan MEMM qorǵaý jónindegi Ulttyq komıtet mamandarynyń kúshimen tizimge 8 qazaqstandyq ótinim engizildi. Olardyń arasynda - dombyramen kúı tartý, qazaqsha kúres, asyq atý, aıtys, kıiz úı qurý, Naýryzdy merekeleý dástúrleri, saıat qustarymen ań aýlaý jáne juqa nan (qatyrma / lavash / ıýpka / ıýfka) pisirý ónerleri bar. Taǵy da bes ótinim qarastyrylýyn kútýde.
Osy salada júıeli negizde atqarylyp jatqan jumystar tól mádenıetimiz arqyly elimizdiń álemge tanylýyna jáne sheteldik týrısterdi tartýǵa jol ashady.
