Kórmeniń uıymdastyrylýy qala turǵyndary men qonaqtaryn Elordanyń tarıhymen tanystyrý, sonaý Saryarqa tórinde ornyqqan ǵajaıyp qalanyń tarıhyna úles qosqan qazaqstandyq sáýletshilerdiń eńbegin nasıhattaýdy maqsat etedi. Astanada boı kóterýge tıisti nysandardyń alǵashy jobalanýy men júzege asyrylǵanǵa deıingi kezeńderi, sondaı-aq elordanyń keleshegine qatysty jobalar da kórmeden oryn alǵan.
Jańa astananyń boı kóterýi árıne, ońaıǵa soqqan joq. Bas qalanyń qurylysyna elimizdiń óndiris oryndary, qurylys kompanııalary atsalysty. Túrkııa, Italııa, Fransııa, Shvesarııa, t.b. elderdiń sáýletshileri men qurylysshylary tartyldy. «Jumyla kótergen júk jeńil» demekshi, aınalasy on jyl ishinde qazaq dalasynda kelbetti qala boı túzdi. Al Astananyń kóshirilýimen birge el damýynyń jańa kezeńi bastaldy.
Kórmeniń saltanatty ashylýynda Almaty qalasy Mádenıet jáne arhıvter basqarmasynyń Tarıhı-mádenı muralar bóliminiń jetekshisi N.A.Kakıjanova quttyqtaý lebizin bildirse, Astananyń boı kóterýine bir kisideı atsalysqan elimizdiń Qurmetti sáýletshisi Tólegen Ábilda Astana jobasy bastalǵan alǵashqy jyldardaǵy sáýlet jumystarynyń qalaı júzege asqany týraly estelikterimen bólisti.
Astanany jobalaýǵa qatysqan, búginde ómirden ótip ketken Qaldybaı Montaqaevtyń Qazaqstan sáýletiniń tarıhyndaǵy orny aıryqsha. Eńbek jolyn «Almatygıprogor» mekemesinde sáýletshilikten bastaǵan Qaldybaı Montaqaev Almaty sáýletimen qatar Astananyń da qalyptasýyna atsalysty. 1996 jyly onyń basshylyǵymen sáýletshiler toby Astanany damytýdyń bas josparyn ázirleý baıqaýynda jeńip shyqqan bolatyn.
Kórme qonaqtaryna sáýletshiniń jary Jibek Ramazanqyzy men ıtalııalyq dızaıner Franchesko Kapılettı Qaldybaı Montaqaevtyń kúsh-jigerin, ónerin salyp jasaǵan jobalarynyń búginde záýlim ǵımarattarǵa, zamanaýı qalaǵa aınalǵanyn tańdanyspen jetkizip, saǵynyshpen eske aldy.
Kórmege kórik berip turǵan T.Ábilda, Sh.Mataıbekov, I.Imanqulov, A.Saýmenov, Iа.Ezaý, V.Kýshenko, A.Rústembekov, T.Eralıev sııaqty elimizdiń tanymal sáýletshileri jasaǵan ǵımarattar óziniń ǵajaıyp sán-saltanatymen erekshelenedi. Kórmege kelýshiler úshin ár jobamen tanysyp, keńinen aqparat alýyna múmkindikter qarastyrylǵan. Tamyz aıyna deıin jalǵasatyn Astanaǵa arnalǵan kórmege qala qonaqtary men mádenı ortalyqtardyń ókilderi qatysty.
Elvıra SERIKQYZY,
«Egemen Qazaqstan»
ALMATY
