Is-shara barysynda qostanaılyq ártister Kaır jáne Damanhýr qalalarynyń operalyq teatrlarynda konsert qoıdy.
Halyq aspaptarynan quralǵan ansambldiń ónerin mysyrlyq ónersúıer qaýym yqylaspen tyńdady. Qazaq mýzykasyn erekshelendiretin úlken mura qazaqtyń túrli kúıleri jurtshylyqty tań qaldyrdy. «Aqjeleń» ansambli Qorqyttyń qobyz saryndary, Qurmanǵazynyń kúıleri, Súgir muralary sııaqty halqymyzdyń urpaqtan urpaqqa berilip kele jatqan áýenderin joǵary deńgeıde oryndaı otyryp, qazaq mádenıetiniń jasampazdyǵyn arab qaýymyna pash etti.
Konsertter Mysyr teledıdarynan tikeleı efırden kórsetildi jáne birneshe ret qaıtalandy. Sonymen qatar, «Aqjeleń» ansambli mysyrlyq «Nil-Mádenıet» telearnasynyń tikeleı efırinen «Bas qosý» atty 3 saǵattyq baǵdarlamasynyń qonaǵy boldy. Elshi Arman Isaǵalıevtiń elimizdiń saıası-ekonomıkalyq jetistikteri, Elbasynyń bastamalary, Qazaqstan men Mysyr arasyndaǵy ekijaqty qatynastar týraly bergen suhbatymen bastalǵan is-sharada qostanaılyq ónerpazdar kórermenderdi dombyra, qobyz sııaqty halyq aspaptarymen tanystyryp, túrli kúılerdi oryndady. Sonymen qatar, kúılerdiń qyzyqty hıkaıalary baıandaldy.
Is-shara barysynda qazaq ádebıetine de nazar aýdaryldy. «Kóshpendiler» trılogııasyn aýdarǵan professor M.Rııad jáne «Mońǵol qyzy», «Aljır» atty romandardyń avtory mysyrlyq jazýshy M.Halım sóz sóılep, qazaqstandyq mádenıet boıynsha oı-pikir almasty.
«ON Live» arnasynyń tańerteńgi «Sabah ON» baǵdarlamasynda «Aqjeleń» ansambliniń múshesi Ybyraı Esjanov qonaqta bolyp, kórermenderdi qazaq dombyrasynyń erekshelikterimen tanystyrdy. «Aqsaq qulan», «Kóńil tolqyny» jáne t.b. kúılerdi keremet oryndap berdi.
Jalpy alǵanda, «Jahandyq álemdegi qazaqstandyq zamanaýı mádenıet» jobasynyń sheńberinde iske asyrylǵan is-shara tabysty ótti. Basqa halyqtardyń mádenıetinde kezdespeıtin qazaq ultynyń aspaptyq pesasy bolyp tabylatyn «kúı» janry mysyrlyq qaýymdy tań qaldyrdy. «Aqjeleńniń» ónerpaz ártisteri oryndaǵan mýzykadan áser alǵan Mysyr halqy qazaq mádenıetimen odan ári tanysýǵa nıetti.
