Baspasóz málimetterine qaraǵanda, qazaqstandyq joǵary oqý oryndary osynshalyqty joǵary deńgeıdegi jetistikke tuńǵysh ret qol jetkizip otyr.
Úzdikter tobyna postkeńestik keńistikten tek eki ýnıversıtet kirgen. Olar QazUÝ jáne Lomonosov atyndaǵy Máskeý memlekettik ýnıversıteti (RF).
Elbasy Qazaqstannyń joǵary oqý oryndarynyń aldyna álemdegi eń úzdik 200 JOO qataryna kirý mindetin qoıyp otyr. QazUÝ álemdik keńistikte moıyndalǵan elimizdiń jetekshi ýnıversıteti retinde osy mańyzdy memlekettik tapsyrmany iske asyrýda júıeli jumys atqarýda. Sońǵy bes jylda ýnıversıtet «QS WUR» reıtıngisinde 400-den astam pozısııaǵa kóterildi. Álemdik tájirıbede birde-bir ýnıversıtet osyndaı ósý dınamıkasyna qol jetkizbegen.
QS - álemdegi barsha memleketter tanyǵan bedeldi jáne kóptegen jyldar boıy álemdegi úzdik joǵary oqý oryndarynyń jahandyq reıtıngin júrgizip kele jatqan yqpaldy halyqaralyq agenttikterdiń biri.
QazUÝ-dyń osy reıtıngide tabysty ilgerileýiniń mańyzdy faktory keń aýqymdy qurylymdyq modernızasııa, nátıjege baǵyttalǵan basqarýdyń joǵary tıimdiligi, sondaı-aq sońǵy bes jyl ishinde 40 paıyzǵa ósken biregeı ınfraqurylymnyń qarqyndy damýy bolyp tabylady. Álemdik deńgeıdegi zertteý ýnıversıtetine aınalý baǵytyn saqtaı otyryp, QazUÝ medısına-bıologııalyq jáne ınnovasııalyq IT klasterin qalyptastyrý boıynsha jumys jasaýda, onyń negizin jańa sýperkompıýter quraıtyn bolady.
Ýnıversıtettiń álemdik deńgeıde tanylýy sonymen birge QazUÝ-dyń turaqty damý boıynsha BUU-nyń «Akademııalyq yqpal» baǵdarlamasynyń Ǵalamdyq haby retindegi belsendi qyzmetimen jáne onyń halyqaralyq jobalarymen de baılanysty. Olardyń ishinde QazUÝ usynǵan ınnovasııalyq-tehnologııalyq jáne rýhanı-adamgershilik platformalardyń sımbıozyna negizdelgen «Ýnıversıtet 4.0» jańa býyn ýnıversıtetiniń modeli bar.
Búginde QazUÝ-dyń tańǵalarlyq tájirıbesin álemniń jetekshi ýnıversıtetteri zertteý ústinde, bul ýnıversıtettiń joǵary básekege qabilettiliginiń kórsetkishi bolyp tabylady. Jetekshi qazaqstandyq joǵary oqý ornynyń álemdik ǵylymı bilim berý keńistigindegi artyp kele jatqan rólin eskere otyryp, «QS Worldwide» Atqarý keńesi 2019 jyldyń qyrkúıeginde ál-Farabı atyndaǵy QazUÝ negizinde búkilálemdik forým jáne joǵary oqý oryndarynyń halyqaralyq kórmesin ótkizý týraly sheshim qabyldady.
