О́tkelde bapker aýystyryp, aman qaldy
Horvatııa birinshiliktiń jasyryn favorıti sanalǵanymen, irikteýden áreń ótti. Ýkraına, Túrkııa, Islandııa sekildi myqty ujymdarmen bir topqa túsip, birshama match-
ta teperish kórdi. Islandııa men Túrkııaǵa qarsy ótken eki oıynda da shaqpaq jeıdeliler jeńilip qaldy. Irikteý aıaqtalarda óz alańynda Fınlıandııamen teń túsip qalyp, kútpegen qıyndyqqa tap boldy. Biraq sońǵy oıynda Ýkraınany syrt alańda utyp, toptaǵy ekinshi orynǵa ıelik etti. Sonyń arqasynda ótpeli oıynǵa qatysyp, Grekııany tas-talqan utty. Bul aralyqta komanda bas bapkeri Ante Chachıch qyzmetinen ketip, ornyna Zlatko Dalıch keldi. Jańa bapkerdiń kelgeni sol edi, qurama qaıta túlep, Álem chempıonatyna joldama aldy. Qazir jańa bapker kómekshisi Ivısa Olıch ekeýi Reseı jerinde atoı salýǵa daıyndalyp jatyr.
Horvatııa quramasynyń basty artyqshylyǵy – qorǵanysy. Eýropadaǵy irikteý synynda bul ujym qaqpasyna nebári 4-aq gol jiberdi. Bul barlyq irikteýge qatysqan quramalar ishindegi eń jaqsy kórsetkishtiń biri.
Saǵyndyrǵan – 98
Iýgoslavııa memleketi ydyraǵannan soń, táýelsiz el bolǵan Horvatııa fýtbol qaýymdastyǵy qurama komandasyn 1998 jylǵy Fransııada ótetin Álem chempıonatynyń irikteýine qatystyrdy. Alǵashqy jarysynda joly bolǵan horvattar Fransııa jerinde jarq etip kórindi. Komanda sensasııa jasap, mýndıaldiń qola júldesine qol jetkizdi. Al shabýylshy Davor Shýker 6 gol soǵyp, úzdik surmergen atandy. Odan keıin bul ujym 2002 men 2006 jyldardaǵy birinshilikterde osy nátıjesin qaıtalaı almady. Qıyn qarsylastar tap bolyp, óz tobynan shyǵa almady. Al 2010 jyly OAR-da ótken jahandyq jarysqa tipti óte almaı qaldy. Irikteýde irkilgen Horvatııa osy oqıǵadan soń fýtbolshylarmen qosa bapkerlerdi de tegis aýystyrdy. Brazılııadaǵy chempıonatqa shyǵyp, taǵy da topishilik matchtarda súrindi. Chempıonattyń alǵashqy oıynynda Brazılııadan jeńilip, ekinshi matchta Kamerýndy 4:0 esebimen utty. Sońǵy sheshýshi oıynda Ante Rebıch shákirtteri Meksıkadan jeńilip qalyp, chempıonatpen erte qosh aıtysty.
«Ajal toby»
Horvatııa jerebe boıynsha «D» tobyna tústi. Bul topty jýrnalıster «ajal toby» dep baǵalady. Sebebi munda jospary joıqyn Horvatııadan bólek, kez kelgenniń apshysyn qýyratyn Argentına, irikteýde dál osy horvattardy jeńgen Islandııa jáne qara qurlyqtyń qabylandary Nıgerııa bar. Sońǵysymen Lýka Modrıch bastaǵan fýtbolshylar 16 maýsym kúni Kalınıngrad qalasynda kezdesedi. Odan keıin 2-týrda Argentınamen shaıqasyp, úlken synaqty bastan keshedi. Al sheshýshi oıyn 26 maýsym kúni Islandııaǵa qarsy bolatyn sekildi.
Horvatııalyq jankúıerler kóbinese Italııanyń «A» serııasynda oınap júrgen shabýylshylaryna senim artady. Marıo Mandjýkıch, Ivan Perıshıch, Nıkola Kalınıchter úsh búıirden qysqanda álgi atalǵan úsh quramanyń qorǵanysy shytynaýy tıis. Boljam boıynsha Horvatııa óz tobynda Argentınany alǵa salyp ekinshi oryn alýy yqtımal eken. Eger jaǵdaı osylaı órbıtin bolsa, onda shaqpaq jeıdelilerdi «S» tobynyń kóshbasshysy bolýy múmkin Fransııa kútip turady. Sondyqtan da kórshi topta ekinshi oryn alýy yqtımal Danııa, Perý, Aýstralııa sekildi ortańqoldarmen oınaý úshin horvattar Lıonel Messı bastaǵan «Albıseleste» komandasyn artqa tastaýy qajet.
Ermuhamed MÁÝLEN,
«Egemen Qazaqstan»
