Jıyn barysynda ol áleýmettik jelidegi jeldeı esken keıbir aqparattardyń shyndyqqa janaspaıtynyn alǵa tartyp, osy rette densaýlyq saqtaý salasynyń mamandary senimdi málimetterdi berip otyratynyn tilge tıek etti.
«Búgingi maǵlumattar boıynsha menıngokokk ınfeksııasynyń ahýaly tómendedi. On jetinshi aptadaǵy jaǵdaı anaǵurlym asqynyp, bir aptanyń ózinde respýblıka boıynsha 15 jaǵdaı tirkelse, Almaty qalasynda 13 jaǵdaı oryn alsa, qazirgi tańda onyń barlyǵy artta qaldy. Sebebi bárimizdi qýantatyn jaǵdaı Almaty qalasynda osy tórt táýliktiń ishinde menıngokokk ınfeksııasyn juqtyrǵan adam tirkelmegen. Sonymen qatar qazir respýblıka boıynsha 24 adam, Almaty qalasy boıynsha 12 adam emdelý ústinde ekenin atap ótkim keledi. Sondaı-aq 3 bala jansaqtaý bóliminde, olardyń 1-i Almaty oblysynda, 2-i Astana qalasynda. Al Almaty qalasynda jansaqtaý bóliminde jatqan naýqas joq. Jáne de turǵyndar úshin der kezinde kerekti aqparat berý úshin biz oblys ortalyqtaryndaǵy densaýlyq saqtaý salasyna qarasty biryńǵaı baılanys oryndarynan tikeleı jedel jeli jumysyn iske qostyq. Tek qana bir táýliktiń ishinde menıngokokk ınfeksııasynan emdelý, saqtaný joldaryn surap turǵyndar tarapynan 4500-deı, al tikeleı jedel jeli jumysyn bastaǵaly 8000-daı telefon qońyraýy kelip tústi. Osydan-aq turǵyndardyń saqtyq sharalaryna mán bere bastaǵanyn baıqaýǵa bolady. Osy oraıda aıta ketetin taǵy bir jaıt, 5-6 maýsym kúnderi Almaty qalasynyń ınfeksııalyq aýrýhanasyna 300-deı adam kelip, dárigerlerden aldyn alý sharalary týraly málimetter aldy. Olardyń eshbirinde ınfeksııa belgileri tabylmady», dedi bas memlekettik sanıtarlyq dáriger.
Sonymen qatar ol laboratorııalyq zertteýler nátıjesine de toqtalyp ótti.
«Biz laboratorııalyq zertteýler jasaı kele, menıngokokk ınfeksııasynyń 3 sırotıpin anyqtadyq. Jalpy, 27 aýrýdan alǵan qozdyrǵyshtardy zerttep, 17-nen A sırotıpi, 9-da B sırotıpi, 1-inde ǵana S sırotıpi anyqtaldy», dedi J.Bekshın.
Raýan QAIDAR,
«Egemen Qazaqstan»
