Ishi qanyq ta tartymdy kórinisterge tolǵan fotoalbomnyń birinshi danasyn syılyq retinde Aqmola oblysy ákiminiń orynbasary Qanat Ydyrysov qabyldap alǵandyǵyn aıta ketý kerek. Fotoalbomnyń mańyzdylyǵyn ákimniń orynbasary bylaısha tujyrymdady: «Qazirgi kezde, Aqmola oblysy ákimdigi tarapynan «Four Seasons» tujyrymdamasy júzege asyrylýda. Atalmysh fotoalbom kýrortty aımaqqa týrısterdi ǵana emes, sheteldik, otandyq ınvestorlardy tartýǵa da septigin tıgizedi». О́z kezeginde Qazaqstan Respýblıkasynyń Tuńǵysh Prezıdenti – Elbasy Qory atqarýshy dırektorynyń keńesshisi Álııa Qaısharova Býrabaı tabıǵatynyń biregeıligin jáne ózindik erekshelikterin álemge áıgileý úshin fotoalbom shyǵarýdy uıǵarǵandyqtaryn aıtty.
«Memleket basshysy osy óńirde bolǵan kezde onyń sulýlyǵyna árdaıym tamsanyp qana qoımaı, tereń tarıhyna da oı júgirtedi. О́ıtkeni Býrabaı Abylaı hanmen tyǵyz baılanysty tarıhqa ıe. Onyń ústine óńir keıbir ańyzdarymen de ózine tartymdy etip keledi. Olaı bolsa jańa fotoalbom arqyly otandyq jáne sheteldik týrısterdiń nazaryn Qazaqstannyń injý-marjanyna aýdara alamyz degen senimdemiz», dedi dırektor keńesshisi aǵynan jarylyp.
Atqarýshy dırektor keńesshisiniń sózine qaraǵanda, Madrıdte BUU janyndaǵy Dúnıejúzilik Týrıstik uıymnyń ǵımaratynda fotoalbom kórmesin tamashalaǵan irgeli uıymnyń qyzmetkerleri sulý da biregeı kartınalardy unatqandary sonshalyq, olar elordaǵa mindetti túrde kelýdi josparlap otyrǵan kórinedi. Sonaý Ispanııadan motosıklderimen shyǵyp, araǵa 20 kún salyp Astanaǵa jetpek nıetterimen bólisipti. Tipti Qazaqstanǵa jasalatyn saparlary týraly kitap ta shyǵarmaq eken.
Asqar TURAPBAIULY,
«Egemen Qazaqstan»
Aqmola oblysy
