Jıyndy ashqan «Egemen Qazaqstan» RG» AQ basqarma tóraǵasy Darhan Qydyráli atalǵan kitaptyń jahandanǵan álemniń geosaıası kelbetin aıshyqtaıtyn týyndy ekenin, jastarǵa baǵyt berer shamshyraq ispetti taǵylymdy eńbek ekenin atap ótti.
Qalyń oqyrmanǵa arnalǵan kitapqa avtordyń egemen elimizdiń álemdik geosaıasattaǵy dara jolyn kórsetetin saraptamalyq maqalalary toptastyrylǵan. Bul rette sóz alǵan elshi-dıplomat Ádil Ahmetov álemdik dıplomatııa men halyqaralyq qatynastardyń búgingi bolmys-bitimi jaıynda tereńinen saraptalǵan týyndyny el ıgiligine arnap otyrǵanyn tilge tıek etti. «Jınaqqa engen maqalalardyń 99 paıyzy ár jyldary «Egemen Qazaqstan» gazetinde jaryq kórgen. Olardy jahandyq geosaıasattyń búgingi-bolmys bitimi, ondaǵy Qazaqstannyń dara joly jáne musylman álemi dep úshke bóldim. Kitapta qazirgi qubylmaly geosaıasat, kósh basynda turǵan Amerıkanyń jaǵdaıy, Qytaı men Eýropa, Sıngapýrdyń jaǵdaıy týraly paıymdamalar bar. Saıasat suńǵylalary – Zbıgnev Bjezınskıı, Genrı Kıssındjer, Djozef Stıglıs, Djeremı Rıfkın ǵulamalardyń kitaptaryn súzip shyǵyp, sonyń sıntezin óz elimizge paıdasy tıer-aý degen maqsatpen toptastyrdym», - dedi Ádil Ahmetov jańa kitaptyń tanystyrylymynda.
«Ǵasyr ǵıbraty» kitabynyń elektrondy nusqasy «Egemen Qazaqstan» gazetiniń saıtyna ornalastyrylǵan.
Ádil Qurmanjanuly Ahmetov 1941 jyly Almaty oblysy Narynqol selosynda dúnıege kelgen. 1963 jyly Almaty shet tilderi ınstıtýtyn aǵylshyn jáne qazaq tili mamandyǵy boıynsha bitirgen. Keıinirek, osy ınstıtýtta oqytýshy, aǵa oqytýshy, dekan, prorektor, rektor qyzmetterin atqarǵan. Odan bólek, Ádil Ahmetov QR Syrtqy ister mınıstriniń birinshi orynbasary (1999-2000), Ulybrıtanııadaǵy Tótenshe jáne О́kiletti Elshisi (2000-2001) bolǵan. 2001 jyly Qazaq-Brıtan tehnıkalyq ýnıversıtetin qurdy. 2007-2013 jyldary Parlamenti Senatynyń depýtaty, Senattyń Halyqaralyq qatynastar, qorǵanys jáne qaýipsizdik máseleleri jónindegi turaqty komıtet hatshysy jáne EQYU sol kezdegi tóraǵasynyń Musylmandardy kemsitý jáne shettetýmen kúres jónindegi jeke ýákili boldy.
