Sharany ashqan QHR Tóraǵasy ótken jyly uıymǵa teń quqyly múshe bolyp qosylǵan Pákistan men Úndistan basshylaryn alǵash ret otyrysqa qatysýlarymen quttyqtady. Sonymen qatar ol búginde ShYU álemdik deńgeıdegi mártebeli uıymǵa aınalǵanyn jáne barlyq memleketter kúsh biriktirgende zor tabysqa jetetindigin basa aıtty.
«ShYU-ǵa tóraǵalyq aıasynda biz jyl boıy mindetimizdi abyroımen atqaryp, saıası, ekonomıkalyq, gýmanıtarlyq, qaýipsizdik, syrtqy baılanystar jáne ınstıtýsıonaldy qamtamasyz etý salalarynda 200-den astam túrli is-shara uıymdastardyq. ShYU jumysynda aıtarlyqtaı ilgerileýshilik boldy. Degenmen bul ilgerileýshilikterdi sizderdiń qoldaýlaryńyzsyz atqarý múmkin emes. Sondyqtan sizderge rızashylyǵymdy bildiremin», – dep atap ótti Sı Szınpın.
Qytaı basshysynyń aıtýynsha, ShYU-ǵa múshe memleketter terrorızm, separatızm jáne ekstremızmge, esirtki saýdasyna qarsy kúsh biriktirýleri qajet. О́zara senimdi arttyryp, tatý kórshilik, dostyq pen yntymaqtastyq erejelerin qatań ustanǵan jón.
«Aǵymdaǵy jyly sizderdiń zor kómekterińizben, qoldaýlaryńyzben ShYU-ǵa tóraǵalyǵymyzdy aıaqtap, sammıt ótkizip jatyrmyz. Qytaı tarapy konstrýktıvti jáne pragmatıvti, dostyq rýhynda osy sammıtte qol jetkizilgen ýaǵdalastyqty uıymǵa múshe memlekettermen birge júzege asyrýǵa daıyn. Aldaǵy ýaqytta Qyrǵyz Respýblıkasynyń uıymǵa tóraǵalyǵyna qoldaý kórsetetin bolamyz», – dedi Sı Szınpın.
