Munda búginge deıin 5 otbasy turyp kelgen. Dalada qalǵan otbasylardyń bireýi ǵana jaıly orynǵa ornalastyrylǵan. Qalǵandarynyń qaıda túneri belgisiz.
Tún ortasynda shyrt uıqydan shoshyp oıanǵan Gúljan Ilıasova osy úıde jubaıy jáne eki balasymen 2011 jyldan beri turady eken. Turýǵa jaramsyz ekenin bile tura amalsyz panalap kelgen. Páter kezeginde 47-shi bolyp tirkelgen. Qazir qaıda bas saýǵalaryn bilmeı dal.
«Basqa turatyn jerimiz joq. Kúıeýim ǵana jumys isteıdi. Páter jaldaı almaımyz. Osy sebepti apattyq baspanany meken etýge májbúr boldyq. Páterimizdiń bir qabyrǵasy qısaıyp tur», deıdi ol.
Qala ákiminiń orynbasary Evgenıı Glotov jaǵdaıdyń baqylaýda turǵanyn jetkizdi. Biraq oqys oqıǵa oryn alady dep oılamapty. Qarjy nemese páter izdestirip jatqan kórinedi. Apattyq úıdi mekendegen jalǵyzbasty keıýanaǵa jataqhanadan ýaqytsha bir bólme berilipti. Ony qudaı saqtapty. Túngi 12-ler shamasynda qabyrǵa syqyrlaı bastaǵanda kóshirilgen. Ile-shala qabyrǵa jalp ete túsken.
Búginde qala boıynsha 18 turǵyn úı apattyq dep tanylǵan. Olarda shamamen 200-ge jýyq adam janyn shúberekke túıip, turyp jatyr.
О́mir ESQALI,
«Egemen Qazaqstan»
