Olardyń Ádep kodeksi talaptarymen úsh qaınasa sorpasy qosylmaıtyn áreketterin Sybaılas jemqorlyqqa qarsy kúres jónindegi ulttyq bıýrosy oblystyq departamenti áshkerelep otyr. Tergeý basqarmasy basshysynyń orynbasary Serǵalı Túsipovtiń baıandamasynda atap kórsetilgendeı, Taıynsha aýdanynyń qazirgi ákimi Vladımır Dýdov Ǵ.Músirepov aýdanyna basshylyq etken tusta qaryndasyna, ákimniń orynbasary Altynshash Taıshabaeva sińlisine baspana alýǵa kómektesip, zań buzýshylyqtarǵa oryn bergen. V.Dýdov komıssııa tóraǵasy retinde beıtaraptyq tanytýdyń ornyna otyrysqa, daýys berýge qatysqan. Ol ózine taǵylǵan aıyptaýlardan sytylyp ketýge qansha umtylsa da, etjaqyn adamdardyń múddesin qorǵaǵany, hattamaǵa qol qoıǵany, osylaısha memlekettik qyzmetke nuqsan keltirgeni taıǵa tańba basqandaı moınyna qoıylyp, qyzmetine tolyq saı emes dep tanyldy. Onyń «sútten aq, sýdan tazamyn» degen ýáji komıssııa múshelerin sendire alǵan joq. Keı turǵyndarǵa berilgen baspanalardyń aýmaǵyna qatysty zańǵa qaıshy jaıttarǵa da tis jaryp úndemegen. Tipti otbasy quramy týraly anyqtama talap etilmegen.
Áńgime aýany V.Dýdov pen onyń orynbasary Talǵat Ábilpeıisovtiń kásipkerlerden zańsyz aqsha jınaǵany týraly máselege aýysqanda talqylaý qyzyp sala berdi. Astanada ótken at báıgesine tuıaǵymen jer tarpyǵan sáıgúlikterdi aparýǵa 100 myń teńge, aýylsharýashylyq merekesin ótkizýge osynsha kólemde qarjy suraǵan faktiler rastaldy. Taǵy bir fermerden 20 myń teńge talap etilgen. Olar bolsa aǵymdyq is-sharalarǵa jergilikti qazynadan qarajat qarastyrylmaǵandyqtan qaltaly azamattardyń kómegine júginýge týra kelgenin, ótinish retinde aıtqandaryn kóldeneń tartqanymen, shaǵyn jáne orta bıznes qyzmetine jónsiz aralasý degen baǵa berildi.
Sybaılas jemqorlyqqa qarsy kúres jónindegi ulttyq bıýronyń jergilikti qurylymy laýazymdy tulǵalarǵa jemqorlyqqa jol berdi degen aıyp taǵyp, qyzmetterinen shettetý týraly usynys aıtqanymen, Ádep komıssııasynyń músheleri basqasha sheshim qabyldady.
О́mir ESQALI,
«Egemen Qazaqstan»
Soltústik Qazaqstan oblysy
