Astanadaǵy Eýrazııalyq balet festıvali tanymal balet juldyzdary men jastardyń nazaryn aýdartqan álemdik deńgeıdegi birden-bir dástúrli iri óner jobasyna aınalyp keledi. Halyqaralyq jobaǵa Qytaı ulttyq baletiniń balet trýppasy, Ispanııanyń ańyzǵa aınalǵan «Castro Romero» ujymy, Gollandııa ulttyq baleti, Portýgalııa ulttyq baleti, Slovenııa ulttyq baleti, «Astana Opera», Abaı atyndaǵy MAOBT, «Astana Balet» teatrynyń ujymdary men Úlken teatr (Reseı) solısteri qatysady dep kútilýde.
Sonymen qatar festıval aıasynda «Astana Balet» teatrynyń sahnasynda tuńǵysh ret álemdik balet juldyzdarynyń Gala-konserti ótpek. Oǵan osy keshke arnaıy shaqyrylǵan, álemniń úzdik teatrlarynyń áıgili ártisteri, atap aıtqanda, Ivan Vasılev (Mıhaılov teatry, Sankt-Peterbýrg), Anastasııa Stashkevıch (Úlken teatr, Máskeý), Frıdeman Fogel men Marııa Eıhvald (Shtýtgart memlekettik baleti), Maııa Mahatelı (Gollandııa ulttyq baleti), Fılıppa de Kastro men Karlos Pınılos (Portýgalııa ulttyq baleti), Baqtııar Adamjan, Mádına Baspaeva men Erkin Rahmatýllaev («Astana Opera»), Farhad Bórıev pen Rıza Qanatqyzy ( «Astana Balet») qatysatyny málim boldy.
23 jáne 24 maýsymda kórermen nazaryna «Jızel» klassıkalyq baletiniń premerasyn usyný josparlanýda. Vıllıstar jaıly kóne poetıkalyq ańyzdyń izimen Genrıh Geıne jazǵan týyndynyń negizinde brazılııalyq horeograf Rıkardo Amarante sahnalaǵan eki aktili balet turmysqa shyqpaǵan, súıiktileri teris aınalǵandyqtan qusadan kóz jumǵan boıjetkender haqynda baıandaıdy.
Al 28 maýsymda astanalyqtar men qala qonaqtary Ispanııanyń – «Castro Romero», al 29 maýsymda tuńǵysh ret Qytaıdyń Ulttyq baleti (Beıjiń) teatrlarynyń ónerin tamashalamaq. Otandyq teatrlarmen qatar álemdik deńgeıdegi tanymal balet sheberleri qatysýymen ótetin gala-konsert, zamanaýı horeograftar ázirlegen nómirler men úzdik týyndylar shoǵyry jan baýraıdy.
– Elordanyń 20 jyldyq toıyn «Astana Balet» teatry tolaıym tabyspen qarsy alyp otyr. Eýrazııa halyqaralyq balet jobasynyń munda ekinshi ret ótkizilýiniń ózi balet solısterine úlken senim arqalatady. Osy oraıda teatrdyń shetelderge gastroldik saparlary men Qazaqstan qalalaryna týrnesi de sátti ótkizilip, kópshilik súıispenshiligine bólengenin ataı ketken jón, – deıdi festıvaldiń atqarýshy dırektory Jánibek Qaıyr.
Qarashash TOQSANBAI,
«Egemen Qazaqstan»
