Osydan 14 jyl buryn «Jasyl el» jasaqtaryn qurý jóninde sheshim qabyldanǵan edi. Sol ýaqyttan beri elimizde atalǵan qurylymnyń bólimsheleri, sonyń ishinde stýdentter men jastar eldi mekenderdi kógaldandyrý men kórkeıtýge jáne tal-terekter men aǵashtar otyrǵyzý isine belsendi túrde aralasyp keledi. Onyń jarqyn mysaldary Aqtóbe aımaǵynda da óte mol. Bıyl bul jumystarǵa oblystyq bıýdjeten 400 mıllıon teńge qarajat bólingen. Mundaǵy basty maqsattyń biri jumyssyz júrgen jastardy da eńbekpen qamtý ekenin eskersek, «Jasyl el» jasaqtary arqalaıtyn jaýapkershilik júgi aýyrlaı túsedi. Áli máseleniń dál osylaısha qoıylýy stýdentterdiń jazǵy demalystaryn tıimdi ári mándi de maǵynaly ótkizýge jol ashady. Aqtóbe oblystyq «Jasyl el» jasaǵynyń tóraǵasy Nurlybek Mýsınniń aıtýynsha bıyl óńirde 6000-nan astam jas óren Aqtóbe qalasy men eldi mekenderdi kógaldandyrý men kórkeıtý jáne abattandyrý jumystarynyń bel ortasynan kórinetin bolady. Árıne onyń bári tegin emes, aqyly túrde júrgiziledi. Iаǵnı «Jasyl el» jasaǵynyń músheleri kem degende aıyna 60-70 myń teńge kóleminde eńbekaqy taba alady.
Taǵy bir aıta keterlik jaıt, jazǵy eńbek maýsymynyń aýqymy barynsha keń ekendigi. Munyń ózi tal-terekterdi kútý men kógaldandyrý, eldi mekenderdi abattandyrý jáne qurylys jumystary sekildi baǵyttardan turady. Bir sózben aıtqanda, oblysta jaz aılarynda qolǵa kúrek pen balǵa ustap jumys isteımin degen jastarǵa eshqandaı kedergi joq. Sondaı-aq «Jasyl el» janashyrlary sapynda bolǵysy keletinderdiń sany jyldan-jylǵa ósip kele jatqany da kóńilge qýanysh uıalatady.
Taǵy bir jaǵymdy jaıttyń biri – ótken jyly Aqtóbe oblysyndaǵy «Jasyl el» jasaǵy shtaby el óńirleri arasynda top jaryp, «Úzdik respýblıkalyq shtab» atanǵany. Bıyl olar osy bıik kásibı deńgeıden tómendeı qoımaıdy degen senim de mol. Aıtalyq sońǵy jyldary Aqtóbe aımaǵynda «Jasyl el» jasaqtarynyń kúshimen mıllıon túpke taıaý kóshet otyrǵyzylǵan. Sóz joq, buǵan óńir jastarynyń qosqan úlesi zor.
Temir QUSAIYN,
«Egemen Qazaqstan»
AQTО́BE
