Is-sharaǵa UQShU-ǵa múshe barlyq memleketterdiń – Armenııa Respýblıkasynan Syrtqy ister mınıstri Zograb Mnasakanıan, Belarýs Respýblıkasynan syrtqy ister mınıstriniń orynbasary Andreı Dapkıýnas, Qazaqstan Respýblıkasynan Syrtqy ister mınıstri Qaırat Ábdirahmanov, Qyrǵyz Respýblıkasynan Syrtqy ister mınıstrliginiń stats-hatshysy Aıbek Omokeev, Reseı Federasııasynan Syrtqy ister mınıstri Sergeı Lavrov, Tájikstan Respýblıkasynan Syrtqy ister mınıstri Sırodjıddın Mýhrıddın, sondaı-aq UQShU Bas hatshysy Iýrıı Hachatýrov qatysty.
Olar halyqaralyq kún tártibi jáne Uıym aıasyndaǵy syrtqy saıası yntymaqtastyqtyń odan ári damýy týraly pikir almasty.
Keńes qorytyndysy boıynsha baıandalǵandaı, kezdesý qatysýshylarǵa Aýǵanstandaǵy aǵymdaǵy ahýal jáne onyń damý perspektıvalaryn baǵalaýdy salystyrýǵa múmkindik berdi.
Otyrys barysynda Sırııadaǵy daǵdarys tek saıası jáne dıplomatııalyq sharalar arqyly sheshilýi múmkin ekendigi týraly jalpy ustanym rastaldy. Osyǵan baılanysty Sırııadaǵy jaǵdaıdy turaqtandyrýdaǵy Astana prosesiniń róli erekshe atap ótildi.
Taraptar AQSh pen KHDR basshylary arasyndaǵy aldaǵy kelissózder Soltústik Koreıa ıadrolyq baǵdarlamasy, qarýsyzdandyrý jáne álemdegi jappaı joıý qarýyn taratpaý máselelerin sheshýde mańyzdy qadam bolatynyna úmit artady.
Sonymen qatar, kún tártibine UQShU men halyqaralyq qurylymdar arasyndaǵy yntymaqtastyqty damytý jáne nyǵaıtý engizilgen. Qazaqstannyń UQShU-ǵa tóraǵalyq etýi BUU Qaýipsizdik Keńesine múshe bolýymen sáıkes keldi. Osylaısha, Qazaqstan atalǵan eki uıym arasyndaǵy kún tártibin jaqyndastyrý boıynsha jumys jasaıdy.
О́z sózinde Q.Ábdirahmanov Prezıdent N.Á.Nazarbaevtyń ótken jylǵy qarashada Mınsk qalasynda ótken mereıtoılyq sammıtte usynǵan basym baǵyttardy iske asyrý Keńes otyrysynyń basty taqyryby bolǵandyǵyn atap ótti.
Áskerı jáne áskerı-tehnıkalyq yntymaqtastyqty damytý men nyǵaıtý, jahandyq terrorızmge qarsy kúres halyqaralyq júıesin qalyptastyrýǵa Uıymnyń qatysýy, kıberqaýipsizdik salasyndaǵy qaýipterge qarsy turýdyń birlesken tásilderin ázirleý jáne esirtkiniń zańsyz aınalymymen kúresýdiń naqty sharalaryn ázirleý sııaqty ózekti máseleler basym baǵyttardyń qatarynda.
Qazaqstan UQShU, TMD, Ortalyq Azııalyq aımaqtyq aqparattyq úılestirý ortalyǵy, AО́SShK jáne basqa da halyqaralyq uıymdar jáne qurylymdarmen yntymaqtastyqty odan ári nyǵaıtý qajet dep sanaıdy.
UQShU Syrtqy ister mınıstrleri keńesiniń búgingi otyrys qatysýshylarynyń kópshiligi Almatyǵa ShYU sammıti ótken Sındao qalasynan kelgendigin atap ótý qajet.
Qazaqstan Respýblıkasynda jáne BUU Qaýipsizdik Keńesinde belsendi ilgerilep kele jatqan Qazaqstan Prezıdentiniń Terrorızmsiz álemge qol jetkizý jónindegi áreket etý kodeksin qurý jónindegi bastamasyn odan ári júzege asyrý UQShU seriktesterimen yntymaqtastyqtyń taǵy bir mańyzdy baǵyty bolyp tabylady. Osy qujattyń negizgi maqsattary BUU júz jyldyǵyna oraı 2045 jyly kontrterrorızm jáne damý boıynsha terrorızmsiz álemge qol jetkizý jónindegi seriktes elderdiń keń halyqaralyq koalısııasyn qurý bolyp tabylady.
Syrtqy ister mınıstrleriniń keńesi Uıymdy ınstıtýsıonaldyq turǵyda nyǵaıtý máselelerine erekshe nazar aýdardy. Atap aıtqanda, Ujymdyq qaýipsizdik týraly shart uıymynyń quqyqtyq mártebesi týraly kelisimge ózgerister engizý týraly hattama jobasy maquldandy.
Kezdesý barysynda taraptar Orta jáne kishi qashyqtyqty zymyrandardy joıý týraly sharttyń kúshine enýiniń 30 jyldyǵyna arnalǵan birlesken málimdemeni qabyldady. «Qazaqstan osy tarıhı kelisimniń qatysýshysy retinde atalǵan qujatqa degen tolyq aınymastyǵyn rastaıdy jáne barlyq taraptardy ony oryndaýǵa jáne saqtaýǵa shaqyrady», - dedi Q.Ábdirahmanov.
Jalpy, UQShU Syrtqy ister mınıstrleriniń keńesi birqatar qujattar boıynsha ýaǵdalastyqtarǵa qol jetkizdi. Olardyń eń mańyzdylary aǵymdaǵy jyly kúzde Qazaqstannyń tóraǵalyǵymen Astanada ótetin UQShU sammıtinde Memleket basshylarynyń qaraýyna usynylatyn bolady.
