Is-sharanyń negizgi maqsaty – Memleket basshysy aıqyndaǵan mindettemelerdi júzege asyrý barysynda aýylsharýashylyq óndirisine IT-tehnologııalardy engizý, elimizdiń agrarlyq salasyn ınnovasııalyq baǵytta keshendi damytý, ǵylymı jańalyqtardy óndiriste paıdalaný, ınvestısııa tartý jáne aýyl sharýashylyǵyna bilikti mamandar daıarlaý isin damytý.
Jıyn barysynda Parlament Májilisiniń Agrarlyq máseleler komıtetiniń tóraǵasy Sapar Omarov, Aýyl sharýashylyǵy vıse-mınıstri Erlan Nysanbaev, QazUAÝ rektory Tilektes Espolov, «Ulttyq agrarlyq ǵylymı bilim berý ortalyǵy» kommersııalyq emes aksıonerlik qoǵamynyń basqarma tóraǵasy Ulan Tájibaev jáne ekonomıka ǵylymdarynyń doktory, Ulttyq ǵylym akademııasynyń akademıgi Ǵanı Qalıev qatysyp, osy saladaǵy ózekti máseleler týraly oı qozǵady.
Májilis depýtaty Sapar Omarov agrarlyq sala boıynsha kásibı mamandardyń jetkiliksiz ekenin aıtyp, osy máseleni ońdy sheshý joldaryn usynsa, vıse-mınıstr Erlan Nysanbaev aýylsharýashylyq óndirisine IT-tehnologııalardy engizýdiń mańyzdylyǵyna aıryqsha mán berdi. Al QazUAÝ rektory Tilektes Espolov bilim ordasynyń sońǵy jyldarda qol jetkizgen tabystaryna toqtala kele, búgingi tańda ýnıversıtettiń ustanǵan baǵyt-baǵdary men osy jerde atqarylyp otyrǵan jumystar jaıynda keńinen baıandady.
– Tek aǵymdaǵy jylda 200 startap joba usynyldy. Onyń ishindegi eń úzdikterine 150-1000 AQSh dollary kóleminde qarjylaı syılyqtar tabystaldy. О́tken jyldyń ishinde ýnıversıtet ǵalymdary aýylsharýashylyq óndirisine engizýge arnap 25 monografııa, 39 usynys shyǵaryp, patent alýǵa 24 oń sheshim berildi. Kóptegen joǵary oqý oryndarynda mamandardy daıyndaýǵa tıisti ınfraqurylym men tıisti ǵylymı mektep joq. Osynyń bári mamandar daıyndaý sapasyn tómendetedi. Qazirgi tańda elimizdiń agroónerkásip kesheninde bilikti mamandarǵa muqtajdyq 80 paıyzǵa jýyqtaıdy. Búgingi kúni aýylda aýyl sharýashylyǵyn jaqsy biletin ekonomıster, býhgalterler, menedjerler tapshylyǵy seziledi. Bul mamandardy agrarlyq JOO-da daıyndaý kerek, – deıdi T.Espolov.
Kóshpeli otyrysqa qatysýshylar oqý orny bazasyndaǵy mamandar daıyndaýǵa arnalǵan oqý, ǵylymı-zertteý zerthanalarynyń, «N.Nazarbaev bilim jáne ǵylym ortalyǵynyń» jumysymen, ýnıversıtettiń jalpy oqý-ǵylymı ınfraqurylymymen tanysty. Sonymen qatar QazUAÝ ustaz-ǵalymdarymen, bilim alýshy jastarymen kezdesip, ózara pikirlesti.
Jıyn qorytyndysy boıynsha «Agroónerkásiptik keshen salasyna bilikti maman daıarlaý jáne aýylsharýashylyq óndirisine IT-tehnologııalardy engizý» boıynsha naqty usynystar ázirlenip, tıisti memlekettik organdarǵa joldanatyn bolady.
Kóshpeli otyrystyń ýnıversıtettegi jıynynan soń Agrarlyq máseleler komıtetiniń músheleri men ǵalymdar Almaty oblysy aýmaǵynda ornalasqan «Amiran» Qazaq taǵamtaný akademııasynyń zaýytyna, Qazaq eginshilik jáne ósimdik sharýashylyǵy ǵylymı-zertteý ınstıtýtyna, Qazaq kartop jáne kókónis sharýashylyǵy ǵylymı-zertteý ınstıtýtyna jáne basqa da sharýashylyqtarǵa arnaıy baryp, mamandarmen, agrobıznes ókilderimen kezdesip, ortaq máselelerdi sheshýdiń tıimdi joldaryn talqylamaq.
Ǵalym SÚLEIMEN,
«Egemen Qazaqstan»
ALMATY
