О́tken jeksenbi kúni Shýchınsk qalasyna kelip jetken oqýshylardy oblystyq bilim basqarmasynyń ókilderi qarsy aldy. Áleýmettik jaǵynan az qamtylǵan otbasylarynyń 134 bala men olardyń jetekshilerin birneshe topqa bólip, tabıǵaty tamyljyǵan Býrabaıdyń baýraıyndaǵy «Zvezdnyı» balalar saýyqtyrý ortalyǵyna jaıǵastyrdy. Qarsy alýshy jaqtyń ókili, oblystyq bilim basqarmasy basshysynyń orynbasary Botagóz Dúısenovanyń aıtýynsha, meıman balalar úsh kún boıy Kókshetaý men Qaraótkeldiń úzilip túsken monshaqtaı kógildir kólder men máńgi jasyl qaraǵaılar kómkergen ajarly aımaǵyn aralap, tarıh tylsymynan tamyljyta syr sherter kıeli jerlerin súzip shyqpaq. Jalǵyz ol ǵana emes, aksııa barysynda ártúrli qyzyqty mádenı-sporttyq sharalardy qamtý da mejelenip otyr.
– El tarıhyn uǵyndyrý jas urpaqtyń bilim kókjıegin keńeıte túsedi. Búgin biz osy eki oblystyń mektep oqýshylaryn qushaq jaıa qarsy alyp jatsaq, keıin aqmolalyq balalar da sol aımaqtarǵa saıahat jasaıdy, – dedi Botagóz Dúısenova.
Alǵashqy kúni balalar Býrabaıdyń baýraıyndaǵy maral sharýashylyǵy mańyndaǵy kóne dáýirdiń kózindeı bolyp kórinetin «Jaılaý» etnoaýylynda boldy. Qaz-qatar tigilgen aqshańqan kıiz úıler beınebir baǵzy zamannan údere kóship kelip, taý eteginde at shaldyryp, baıyz tapqandaı. Meıman balalar qonaqjaı eldiń darhan peıilimen usynǵan ulttyq taǵamdardan dám tatty. Mamyrajaı tirshiliktiń ózindik sáni men saltanaty kóńil arbap, ertegideı sulý álemge jeteleıdi. Arqanyń samal jelimen qosyla terbelgen altybaqan basynda «qulaqtan kirip boıdy alar» ásem án áýelep tur. Jeli basynda shurqyraǵan qulynnyń symbaty qandaı ádemi. Meımandar jýas attarǵa minip, jele shoqytyp, jer tanyp bir jasap qaldy.
– Osyndaı ádemi jerge kelgenime qýanyp turmyn,–deıdi Oral qalasynan kelgen 8-synyp oqýshysy Jasmın Beısenǵalıeva.
– Tabıǵaty ǵana emes, adamdary da aqjarqyn eken. Apaılarymyz erteń Abylaı han alańy men murajaıynda bolasyzdar dedi, tamasha emes pe?!
Uıymdastyrýshylardyń aıtýyna qaraǵanda, talaı tarıh meltektep bógip jatqan Býrabaı aýdanyndaǵy kıeli jerlerdi aralatyp, jas meımandardyń jadyna el tarıhynyń eleýli belesterin ornyqtyrmaq. Sonymen qatar oblys ortalyǵyndaǵy tarıhı jerlerdi de kórsetpek.
El tanyǵan, jer tanyǵan qandaı jaqsy. Alystan osy sapardy ańsap jetken jas tolqyn qas-qaǵym sátin bos jibermeı, ultynyń ótken ulaǵaty, tarıhy jáne mádenıetimen bajaılaı tanysyp, tereńinen boılamaq. Jobanyń kózdegeni de osy emes pe?
Baıqal BAIÁDILOV
Aqmola oblysy
