Bas dáriger Ádil Dórjanovtyń aıtýynsha, kardıologııalyq ortalyq jumysy qazir sıfrly júıege kóshken. Iаǵnı emdeý jáne aldyn alý úderisterinen bastap ishki qujat aınalymy da tolyq elektrondy formatta jumys isteıdi. Ortalyqta 25-ten asa medısınalyq jańa tehnologııalar júıesi engizilipti. Innovasııalyq jańashyldyqtar balalar men jasóspirimderdiń dimkás júrekterine ota jasaýǵa múmkindik berdi.
Á.Dórjanov – óńirdegi kardıohırýrgııalyq ortalyqtyń, jalpy, osy salanyń damýynyń bastaýynda turǵan oblys kardıohırýrgteriniń biri. Máskeýde medısınalyq joǵary bilim alǵan ol 2009 jyly Pavlodarǵa oraldy. Oblys ortalyǵyndaǵy №2 qalalyq aýrýhanada dárigerlik jolyn bastady. Ádil Ádilbekuly osy jyldar aralyǵynda 2 myńnan astam júrekke ota jasady. Osynsha adam ómirin saqtap qaldy.
Sonymen birge ortalyqta ómirin densaýlyq saqtaý salasyna arnaǵan áýletter de qyzmet etýde. Mysaly, kardıohırýrg Almas Ántekeev – medısına ǵylymdarynyń kandıdaty, ortalyqtaǵy «Júrektiń ıshemııalyq aýrýlary» bólimshesiniń meńgerýshisi. Jubaıy Sholpan Qaıytqyzy – №1 qalalyq emhanada kardıolog, emhananyń fýnksııalyq dıagnostıka dárigeri. Semeı medısına ınstıtýtynda stýdent kezderinde otbasyn qurǵan jastar joldamamen Pavlodarǵa kelgen. Al bul kúnderi kardıohırýrgııa ortalyǵyndaǵy ekstrakorporaldi qan aınalymy bólimshesiniń meńgerýshisi Dáýren Almasuly – Ántekeevter otbasynyń tuńǵyshy. Joldasy Samal – muǵalim. Áke-sheshesi sekildi Dáýren de kardıologııa salasy mamandyǵyn tańdady. Qaryndasy Álııa Almasqyzy qazir Astana medısınalyq ýnıversıtetiniń 4-kýrsynda oqıdy.
Almas Muratuly 1999 jyly qalalyq №1 aýrýhanada qyzmet etip júrgen kezde osy joldardyń avtoryna da ota jasaǵan edi. Áli esimde, ish qurylysyma ekinshi ret óte kúrdeli, aýyr ota jasaldy. Ol kezde keıbir analızderdi Almatyǵa jiberetin. Qazirgideı myqty tehnologııa joq. Almas jasaǵan sátti otadan keıin otbasyma oraldym. Keıde kórgende:
– Aıttym ǵoı men sizge, 100 jasaısyz! – dep qaljyńdap jatady.
Aq halatty abzal jan degen osy.
– Keýde tusyńyz shanshyp aýyrsa, arqańyzǵa nemese qolyńyzǵa beriletin bolsa, sýyq ter shyqsa, demikpe paıda bolsa, qan qysymyńyz birese joǵarylap, birese tómendeı berse birden kardıolog dárigerdiń kómegine júginińiz, – deıdi Almas Muratuly. – Jylyna bir ret kardıogrammadan ótip turý qajet.
Bul kúnderi Á.Dórjanov basqaratyn ortalyq kardıohırýrgteri mamandyqtaryna saı biliktilikterin jetildirý úshin Belarýs, Reseı, Izraıl, Fransııa, Italııa, Aýstrııa, Anglııa, Nıderland elderinde ótetin halyqaralyq kongrester, konferensııalar, sımpozıýmdarǵa qatysady. Ortalyqta kardıolog-dárigerler Aıjan Ahmetbekova, Elena Kochengına, Sáýle Aıtpaeva, Mánshúk Satabaeva, Natalıa Pedashenko, Kúlásh Myqymova, Krokýs Vladımır, Marat Janbosynov, Darhan Daırov jáne basqa da dárigerler birlese qyzmet etýde.
Barlyq bólimsheleri zerthanalar, dıagnostıkalyq zertteýler sońǵy úlgidegi medısınalyq qural-jabdyqtarmen jaraqtalǵan. Jańa tehnologııanyń kómegimen kishkentaı sábılerdiń júregine ota jasalýda. Ortalyq ujymynyń ortasha jasy 28 jasty quraıdy. Qazir júrekke ota jasaıtyn hırýrgterdiń kóbi qazaq jastary.
Elbasy Nursultan Nazarbaev oblysqa jasaǵan jumys saparlarynyń birinde ortalyqqa kelip, jas kardıohırýrg dárigerlermen júzdesken bolatyn.
– Elimizde medısına salasyna basa mán berilýde. Astanada kardıohırýrgııalyq klaster qalyptasty. Árbir óńirde ortalyqtar ashylýda. Endigi kezek – dárigerlerdiń biliktiliginde. Reseılik áriptestermen baılanysty nyǵaıtý kerek. Bul úshin jol ashyq. Úırenýge nıetti adamnyń qolynan kelmeıtin dúnıe joq, – degen edi sonda Elbasy.
Mysaly, biraz jyl buryn týabitti júrek aqaýy bar sábılerge ota jasaımyz dep oılaǵan joqpyz. Jańa zaman jetistikterine biz de qol jetkizdik, – deıdi O.Muqashev.
Bul árıne medısınaǵa kelgen jańa ozyq tehnologııalardyń, otandyq dáriger mamandarymyzdyń qol jetkizgen jetistigi. Balalardyń júrek syrqatyna da, tipti týa bitken júrek aqaýy bar jas sábıge de otalar osy ortalyqta jasalady. Oblys aýdandarynan EKG qabyldaý boıynsha ınternet-kabınet jumys isteıdi.
– Innovasııa qazir jergilikti aýrýhanalarǵa jetti. Aldaǵy ýaqytta kardıohırýrgııalyq ortalyqtyń josparynda júzdegen júrekke ota jasaý mindeti tur. Bul qarapaıym halyq júrek aýrýynan emdelý úshin shetel asyp, shıpa izdemesin, ózimizde ota jasatyp, ózimizde emdelsin degen Elbasynyń tapsyrmasy, – deıdi Ádil Dórjanov.
Ortalyqtyń qurylymynda hırýrgııa, ońaltý, ıntervensııalyq kardıologııa, arıtmologııa jáne elektrofızıologııa bólimderi jáne aýysymyna 50 adamǵa arnalǵan konsýltatıvtik-emhana bólimi bar. Ortalyqtyń basty ereksheligi – balalardyń júregine operasııa jasaý múmkindigi bolyp tabylady. Buryn ondaı operasııalar Astana jáne Almaty qalalarynda ǵana jasalatyn.
Farıda BYQAI,
«Egemen Qazaqstan»
PAVLODAR
