Qarjy mınıstri B. Sultanovtyń baıandamasyna sáıkes, memlekettik bıýdjet kiristeri (transferttersiz) 3 290 mlrd teńgeni nemese jospardyń 104,3% qurady. Respýblıkalyq bıýdjet boıynsha kiristerdiń atqarylýy — 100,7%-ti, jergilikti bıýdjet boıynsha — 114,4%-ti qurady. Respýblıkalyq bıýdjet shyǵyndary 3 684,5 mlrd teńgege ıgerildi.
Premer-Mınıstr bes aıdyń qorytyndysy boıynsha aýyl sharýashylyǵy jáne ónerkásip salalarynda ósim baıqalatynan atap ótti. Degenmen, qurylys salasynda aıtarlyqtaı ósim belgilenbegen. Respýblıkalyq obektilerdiń qurylysyna bıýdjette 275,5 mlrd teńge qaralǵan. Qarjy mınıstri B. Sultanovtyń málimdeýinshe, esepti kezeńde jyldyq somanyń tek 15% ǵana ıgerilgen, ıaǵnı 42,2 mlrd teńge. Jyl sońyna deıin 233,3 mlrd teńge atqarylýy qajet.
Investısııalar jáne damý mınıstri J. Qasymbek óz kezeginde nysandar qurylysy boıynsha jumystardyń keste boıynsha júrgizilip jatqanyn jáne jyl sońyna deıin jospardyń oryndalatynyn jetkizdi.
Máseleni qaraý nátıjeleri boıynsha Baqytjan Saǵyntaev aýyl sharýashylyǵy men óndiris salasyndaǵy kórsetkishterdiń óskenin atap ótti. Áıtse de, bıýdjet qarajatyn tıimdi paıdalanýdy muqııat qadaǵalap, tıisti konkýrstyq prosedýralardy ótkizý úshin is-sharalar qabyldaý tapsyryldy.
Qarjy mınıstrligine osy jyldyń alty aıynyń qorytyndysy boıynsha belgilengen ındıkatorlardy oryndamaý kezinde bólingen qarajatty qaıtaryp alý jáne ony Memleket basshysy qoıǵan basqa mindetterdi iske asyrý úshin qaıta bólý tapsyryldy. Aýyl sharýashylyǵyn, qaıta óńdeý salasyn damytýdy, ekonomıkany nesıelendirýdi qarjylaı qamtamasyz etý boıynsha mindetterdi sheshý úshin júıeli sharalardy kúsheıtý qajet.
Baqylaýǵa alý QR Premer-Mınıstriniń birinshi orynbasary A. Mamın men QR Premer-Mınıstriniń orynbasary E. Dosaevqa tapsyryldy.
