Mádenıet jáne sport mınıstrligi uıymdastyrǵan halyqaralyq festıval otandyq jáne sheteldik tanymal sýretshilerdi qushaq jaıa qarsy aldy. Olardyń qatarynda Ulybrıtanııanyń Koroldik óner qaýymynyń múshesi Aleksandra Konnor, Japonııanyń akvarelmen beıneleý óneriniń has sheberi Akıra Mýrata, Brazılııadaǵy Panamerıka óner ordasynyń tálimgeri Jızel Ýlıss, Úndistannyń zamanaýı kórkemóner sheberi Ram Vıranıan, AQSh Ulttyq óner grantynyń ıegeri Artem Mırolevıch, Gollandınyń retro kórkemóner sheberi Dımıtrıs Voıazogloý bar. Sonymen qatar, Tileýjan Batanov, Aınabek Ospanov, Gúlmıra Telǵozıeva, Baqtygereı Teleýbaı, Amangeldi Kenenbaev, Nurbazar Qojın, Qaıyr Orazǵalıev syndy otandyq qylqalam sheberleri de kóz tartar jumystaryn elorda turǵyndary men qonaqtarynyń nazaryna usyndy.
Kópten kútken kórmeniń ashylý saltanatynda Mádenıet jáne sport mınıstrliginiń jaýapty hatshysy Qýatjan Ýálıev festıvaldiń ashylýymen jınalǵan kópshilikti quttyqtap, jyly lebizin bildirdi. «Mádenı yntymaqtastyqty halyqaralyq deńgeıde qaryshtaýdy kózdegen «Nur kelbetti Astana» festıvaliniń ashylýymen barshańyzdy quttyqtaımyn. Bizdiń ulttyq brendimizge aınalǵan Astananyń 20 jyldyǵy qarsańynda ótkizilip otyrǵan bul shara jemisin beredi dep oılaımyn. Sebebi, festıval Astanany álemge tanytýmen qatar, shet eldermen yntymaqtastyq qarym-qatynasty nyǵaıta túsip, áıgili sýretshilerdiń qoltańbasyn Qazaqstan tarıhyna engizip, keleshekte mádenı baılyǵymyzdyń mańyzyn arttyrýǵa septigin tıgizedi», dedi Q. Ýálıev.
Sheteldik qonaqtardy Elordanyń 20 jyldyq tarıhy men shejiresimen, mádenı jáne rýhanı oshaqtarymen, qonaqjaı halqymen tanystyrýǵa baǵyttalǵan saltanatty mereke aıasynda sýretshiler qala tynysymen tanysa otyryp, shabytyn qylqalam arqyly qaǵaz betine túsirdi. «Bul is-sharaǵa álemniń 250 sýretshisi qatysýǵa nıetterin bildirip, jumystaryn usynǵan bolatyn. Barlyq jumystar iriktelip, sonyń ishinen tek 20 sýretshi aıqyndalyp, búgingi kórme zalyna týyndylaryn halyq nazaryna usyndy. Halyqaralyq deńgeıde ótkizilip otyrǵan shara aıasynda sheteldik sýretshiler Qazaq Ulttyq Ýnıversıtetinde oqytýshylar men stýdentterge arnap sheberlik sabaqtaryn ótkizedi» - dep, túsindirdi joba avtory Sábıt Ábdihalyqov.
Astananyń asqaq beınesin asqan sheberlikpen salǵan 20 qatysýshyǵa arnaıy sertıfıkattar tabys etilip, sóz kezegi sheteldik sýretshilerge berildi. Festıval maýsym aıynyń sońyna deıin jalǵasady, al kóz tartar ǵalamat týyndylar Ulttyq Mýzeı qoryna tabys etilmek.
Aleksandra Konnor, sýretshi, Ulybrıtanııa Koroldigi:
Bul meniń Astanaǵa alǵash kelýim. Qala kelbetine qarap turyp nebári jıyrma jyldyq qana tarıhy bar ekenine senbedim. Qazaq halqy óte qonaqjaı ekenin buryndary estigen bolatynmyn. Biraq bul qonaqjaılylyqty óz kózimmen kórý jáne seziný bólek nárse. Keleshekte osyndaı jobalar Qazaqstanda ótkizilse qýana qatysamyn.
Djovannı Tomassı Ferronı, sýretshi, Italııa:
Men úshin «Nur kelbetti Astana» shyǵarmashylyq tájirıbe almasý men jańa kózqarastarmen qosa, jańa áriptes, jańa dostar tabý múmkindigin syılady. Italııa arhıtektýrasynyń tarıhy óte baı, sondyqtan da ǵımarattardyń kóbi jyldar aǵymyna saı kóne bolyp keledi. Al Astana jas qala bolǵandyqtan, zamanaýı eskertkishter men arhıtektýranyń jańa túrlerine toly ǵımarattar bar bolǵandyǵy meni qýantady. Qala óte ádemi ári tartymdy. Osyndaı tamasha múmkindik syılaǵandaryńyz úshin rahmet!
Botakóz Amalbek,
L.N. Gýmılev atyndaǵy EUÝ-niń 1 kýrs stýdenti
