500 shaqyrymdy artqa tastap jetken balalar eń áýeli ekskýrsııany Esil ózeniniń jaǵasynan bastady. Budan soń sholý sheńberi men okeanarıým, ekzotarıým, Astana parkin aralap, qala ortalyǵyndaǵy memlekettik sımvoldar alańyn aralady.
Atalǵan ekskýrsııanyń basy-qasynda júrgen, Astana qalasy boıynsha tájirıbeli gıd Erkin Turǵanálıev jobanyń maqsaty men mańyzyn egjeı-tegjeı túsindirip berdi. «Astana qalasy ákimdiginiń uıymdastyrýymen «Astana Konvenshn Bıýro» JShS men SkyWay uıymdastyrǵan bul baǵdarlamaǵa elimizdiń 15 oblysynan az qamtylǵan, múmkindigi shekteýli bir top balalar keledi. Osyǵan deıin Almaty men Aqmola oblysynan 100-ge jýyq bala qatysqan bolatyn. Búgingi ekskýrsııaǵa Ekibastuz, Aqsý jáne Pavlodardan 34 bala keldi», deıdi Erkin Turǵanálıev.
Baǵdarlamanyń ekinshi kúninde qalaǵa qydyryp kelgen balalar «Báıterek» monýmenti, «Han Shatyr» saýda-úıi, ulttyq mýzeı, «Qazaq eli» monýmenti syndy kompozısııalyq qurylysymen daralanatyn qalanyń eń kórikti jerlerimen tanysa alady.
Atalǵan týrdyń uıymdastyrýshysy, «Astana Konvenshn Bıýro» JShS qyzmetkeri Olga Kadnıkova: «Biz qalamyzdyń panoramalyq kórinisin kórsetý maqsatynda balalardy eki qabatty ekskýrsııalyq avtobýspen tasymaldaýdy jón dep sanadyq. Balalarǵa jaqsy áser qaldyrý úshin astanamyzdyń eń kórikti, ásem jerlerin, ǵımarattaryn kórsetýge tyrystyq», dep joba jaıly qysqasha túsinik berdi.
4 maýsymda bastalǵan «Astana – meniń Otanymnyń elordasy» áleýmettik jobasy tamyz aıyna deıin jalǵasady. Elimizdiń 15 oblysynan kelgen balalar elordanyń tarıhı jáne mádenı oryndaryn tamashalady, sonymen qatar olarǵa kásibı gıdterdiń qatysýymen erekshe ekskýrsııa jáne mádenı-kóńil kóterý baǵdarlamasy uıymdastyryldy.
Baǵdat ÁShIM,
L.N.Gýmılev atyndaǵy EUÝ-dyń 1-kýrs stýdenti
