Tarıhı kezdesýge kelgen eki prezıdent Sıngapýrdyń Sentos aralyndaǵy lıýks-otelde qol alysyp, shamamen elý mınýttaı aýdarmashylardyń qatysýymen ońasha áńgimelesti. Ońasha kezdesýden soń Tramp kelissóz jalǵasatynyn aıtyp, Koreı túbegin ıadrolyq qarýsyz aımaqqa aınaldyrýda tabysqa jetetininen úmitti ekenin bildirdi. Sondaı-aq Donald Tramp AQSh pen Phenıannyń ara-qatynasy jaqsaratynyna senimdi ekenin jetkizdi. Kım Chen Yn bul sammıttiń kóptegen kedergige tap bolǵanyn atap ótti.
Ońasha kezdesýden keıin olarǵa eki el delegasııasynyń ókilderi qosyldy. BBC-diń habarlaýynsha, AQSh delegasııasy quramynda memlekettik hatshy Maık Pompeo, prezıdent ákimshiliginiń basshysy Djon Kellı, prezıdenttiń ulttyq qaýipsizdik máseleleri boıynsha keńesshisi Djon Bolton jáne AQSh-tyń Fılıppındegi elshisi Sýn Kım bolǵan. Keńeıtilgen quramdaǵy sammıtten soń D.Tramp pen Kım Chen Yn resmı málimdeme jasaǵan joq.
Kezdesýdegi basty taqyryp KHDR-dyń ıadrolyq qarýdan bas tartýy tóńireginde órbigenin joǵaryda aıtyp óttik. Halyqaralyq qoǵamdastyq Soltústik Koreıany sońǵy onjyldyqtarda adam quqyqtaryn shektedi, ıadrolyq qarýdy synady, halyqaralyq zańdardy buzdy dep aıyptap, túrli sanksııalar salyp keledi. Sheteldermen baılanysyn shektep, oqshaýlanǵan KHDR búginde jabyq saıasat ustanady.
AQSh Phenıannyń ıadrolyq qarýdan bas tartqanyn, oqtumsyqtardy úshinshi tarapqa bergenin qalaıdy. Sarapshylardyń pikirinshe, KHDR bul talapqa qarsy sanksııalardan aryltýdy suraýy múmkin. Phenıannyń ortalyq aqparat agenttigi kezdesý ótpes buryn sammıtte «KHDR men AQSh arasyndaǵy qarym-qatynastyń jańa deńgeıi, Ońtústik Koreıamen baılanys jáne ıadrolyq qarýsyzdaný» taqyryptary talqylanatynyn habarlady.
Euronews-tiń habarlaýynsha, sammıttiń sońynda eki el basshylary joǵary deńgeıli kelissózderdiń nátıjesi boıynsha birlesken qujattarǵa qol qoıǵan. Alaıda olardyń naqty qandaı qujattar ekeni habarlanbady. Keıbir aqparat quraldarynyń jazýynsha, jýrnalıster Kım Chen Ynnan «ıadrolyq qarýdan bas tartasyz ba?» dep úsh ret suraǵanymen, ol jaýap bermegen.
Aıta ketý kerek, AQSh pen KHDR basshylarynyń alǵashqy kezdesýine daıyndyq kúrdeli ótti. Birneshe aı buryn Tramp pen Kım bir-birin balaǵattap, tipti ıadrolyq soǵys týraly aıtyp, doq kórsetti. D.Tramp BUU minberinde turyp Koreıany joq qylatyny týraly aıtsa, Kım Chen Yn óz kezeginde Amerıka prezıdentin «esýas, jyndy» dep balaǵattady. Mamyr aıynda Tramptyń keńesshisi Djon Bolton Soltústik Koreıany Lıvııamen salystyrǵannan keıin sammıt múldem ótpeı qala jazdady. 24 mamyr kúni AQSh prezıdenti kezdesýden bas tartyp, 6 kúnnen soń sammıttiń bolatynyn habarlady. Kezdesý ótetini belgili bolǵanda Soltústik Koreıa Pýngerıdegi ıadrolyq synaq polıgondaryna demontaj jasady.
Gúlnur QÝANYShBEKQYZY,
«Egemen Qazaqstan»
