Otyrysqa Komıssııa músheleri – respýblıkalyq buqaralyq aqparat quraldarynyń, shyǵarmashylyq odaqtardyń, jýrnalısterdiń qoǵamdyq birlestikteri men múddeli memlekettik organdarynyń ókilderi qatysty.
Memlekettik hatshy jıynda sóılegen sózinde buqaralyq aqparat quraldarynyń Qazaqstan memlekettiligin nyǵaıtýdaǵy mańyzdy róline toqtalyp, BAQ ókilderin kele jatqan kásibı merekeleri – Baılanys jáne aqparat qyzmetkerleri kúnimen quttyqtady.
«Bul marapat osymen 22-shi ret berilip otyr. BAQ Memleket basshysynyń bastamalaryn halyqqa jetkizý, memlekettik saıasatty túsindirý, qoǵamdyq pikir qalyptastyrý, azamattyq qoǵamdy damytý isinde mańyzdy ról atqarady. Osyndaı mártebeli de jaýapty mıssııany laıyqty atqarý úshin baspasóz básekege qabiletti bolýy shart. Memleket basshysy Nursultan Ábishuly Nazarbaev otandyq jýrnalıstıkany damytý máselesine zor mán beredi. Osy baǵytta júıeli jumystar júrgizilýde. Prezıdenttiń jýrnalısterge arnalǵan granttary men syılyqtary osyndaı qoldaýdyń aıqyn kórinisi», dedi Memlekettik hatshy.
G.Ábdiqalyqova memlekettiń buqaralyq aqparat quraldarynyń róline tereń mán berip, árdaıym qoldaý kórsetip otyratynyn jetkizdi. Sondaı-aq kásibı deńgeıi men sheberligin udaıy jetildirip otyratyn talantty jýrnalısterdiń shyǵarmashylyq bastamalary men ynta-jigerin qoldaýdyń qajettigin atap ótti.
«Elimizde jáne shetelde bolyp jatqan mańyzdy oqıǵalar Qazaqstandaǵy reformalardyń baǵyty men memlekettik saıasatty durys jetkizý isindegi otandyq BAQ-qa degen joǵary suranystyń jáne onyń erekshe rólin aıqyndaıdy. Jalpyǵa ortaq aqparattandyrý ǵasyrynda dál ári naqty aqparat negizgi qundylyq bolyp tabylady», dedi G.Ábdiqalyqova.
Memlekettik hatshy elimizdiń medıa-qoǵamdastyǵy óziniń «tórtinshi bılik» retindegi joǵary mártebesin rastaı otyryp, qazaqstandyq patrıotızmdi nyǵaıtýǵa, qoǵamdyq kelisim men etnosaralyq tatýlyq qundylyqtaryn bekemdeı túsýge, memleket pen qoǵamnyń ózekti problemalaryna jedel ún qatýǵa septigin tıgizetinin aıtty.
Bıyl Qoǵamdyq komıssııanyń qaraýyna 61 usynym berildi, sonyń ishinde 47-si jýrnalısterge, 14-i shyǵarmashylyq ujymdarǵa qatysty. Bul rette 25 usynym baspasóz basylymdarynan, 36 usynym elektrondy BAQ-tan, telekompanııalardan, telearnalardan kelip tústi.
Qoǵamdyq komıssııa otyrysynda jýrnalıster materıaldarynyń deńgeıi joǵary ekendigi, sondaı-aq baspasóz qoǵamdastyǵynyń Qazaqstan damýynyń mańyzdy qoǵamdyq-saıası jáne áleýmettik-ekonomıkalyq máselelerin jarııalap, kórsetýdegi úlesi atap ótildi.
Talqylaý qorytyndysy boıynsha, BAQ salasyndaǵy prezıdenttik marapattardy taǵaıyndaý erejesine sáıkes, Qoǵamdyq komıssııa ashyq daýys berý arqyly BAQ ókilderine 2 syılyq berý, 2 grant tapsyrý jáne 4 shyǵarmashylyq ujymǵa Prezıdent Alǵysyn jarııalaý jóninde Memleket basshysyna usynys jasaý týraly biraýyzdan qaýly qabyldady.
Abaı ASANKELDIULY,
«Egemen Qazaqstan»
