Ata-babalarymyz mura etip qaldyrǵan asyl muralarymyz ben qundylyqtarymyzdy jandandyrý baǵytynda óńirde kóptegen ıgilikti sharalar atqarylyp keledi. Dástúrli jarystyń ashylý saltanatynda sóılegen sózinde oǵan oblys ákiminiń orynbasary Madııar Qojahmet toqtalyp ótti. Ulttyq oıyndarǵa baýlıtyn balalar jáne jasóspirimder mektepteri qataryna «Tulpar» at sporty jáne «Qyzyljar arlandary» qazaqsha kúres klýbtary qosylǵaly qyzyǵýshylyqtyń arta túskeni baıqalady.
Delebeni qozdyratyn dúbirli dodada aýyldardan kelgen, bulshyq etteri bult-bult oınaǵan, qoly qarýly, taqymy myqty alty júzden astam sportshy kúsh synasyp, saıys kórigin qyzdyra tústi. Qazaqtyń erteden qalyptasqan kóne ulttyq oıyny kókpar dese ottaı laýlap qoıa beretin Ýálıhanov aýdanynyń bilekti de júrekti namysshyl jigitteri elishilik bási joǵary jarystarda myqtylyq tanytyp júrgenderin osy joly da qapysyz dáleldedi. Qyzyljar aýdanynyń komandasyn 12:1 esebimen oısyrata utyp, ábjil qımyldarymen, erekshe sheberlikterimen tánti etti. Komandanyń eń jas qatysýshysy 14 jastaǵy Arystanbek Mahatov jastaıynan at qulaǵynda oınap ósip, byltyr komanda quramyna qabyldanypty. Osy joly birneshe salym tastap, jankúıerlerdiń qoshemetine bólendi. Onyń atasy kezinde kókpar, aýdaryspaq sekildi ulttyq oıyndardyń damýyna zor úles qosqan. Qazir zeınetke shyqsa da tazy ıt ustap, júırik at baptaýmen aınalysady.
Spartakıadaǵa Ǵ.Músirepov aýdanynyń komandasy da jap-jaqsy daıyndyqtarmen kelgenin tanytty. Sóıtip, teńge alý, aýdaryspaq, toǵyzqumalaq pen asyq atýdan eshkimge des bermedi. Qyzyljarlyqtar jekpe-jek pen armrestlıngten jeńimpaz atanyp, kókkpardan ketken eseniń ornyn toltyrǵandaı boldy.
– «Ulttyq oıyndar spartakıadasynyń birinshi kezeńinde eń kóp upaı jınaǵan Ǵ.Músirepov, Qyzyljar, Esil aýdandary kósh bastap keledi. Ekinshi kezeńi 21-23 maýsym aralyǵynda Maǵjannyń týǵan jeri Sarytomar aýylynda uıymdastyrylyp, jurtshylyq at sporty men qazaq kúresin, onyń ishinde túıe balýan beldesýin tamashalaıdy. Bas júldege eki jeńil kólik tigilip otyr», – dedi áńgimeleskenimizde jarystyń bas tóreshisi Rýslan Aryqov.
О́mir ESQALI,
«Egemen Qazaqstan»
Soltústik Qazaqstan oblysy,
Qyzyljar aýdany
