Mundaı kórsetkishter «Týrızmdi damytýdyń 100 qadamy» qalalyq baǵdarlamasyn júzege asyrý boıynsha Almaty qalasynyń ákimi Baýyrjan Baıbektiń qala týroperatorlarynyń qatysýymen ótkizgen keńeste málim boldy.
Qala ákiminiń orynbasary Ásel Júnisovanyń aıtýynsha, halyqaralyq «EKSPO-2017» kórmesiniń, Búkilálemdik Ýnıversıadanyń, OESR Eýrazııalyq aptalyǵynyń, sonymen qatar «Star of Asia», «Uly dala oıyndary», «Tour of Almaty» t.b. mýzykalyq, sporttyq sharalardyń ótýi týrıster legine oń yqpal etken.
«Búginde qala ekonomıkasynyń 87%-y qyzmet kórsetý salasyna qatysty bolsa, jalpy óńirlik tabystaǵy týrızmniń úlesi nebary 1,5% quraıdy eken. Megapolıstiń týrıstik áleýetin arttyrý maqsatynda Almaty aglomerasııasynyń taý týrızmi boıynsha jospary jasalyp, onyń quramyna Medeý, Shymbulaq, Almataý jáne Býtakovka engen. Bıylǵy jyly álemdik deńgeıdegi Kempinski jáne Novotel otelderiniń, túrli býtık-otelder men hostelderdiń qurylystaryn aıaqtaý josparlanǵan. Jyl aıaǵyna deıin 14 halyqaralyq agenttik úshin BUU-nyń óńirlik HAB-y ashylatyn bolady», – dedi Ásel Júnisova. Sonymen qatar qazirgi kezde týrısterdiń kópshiligi arnaıy veb-tuǵyrlar arqyly jekelegen demalystaryn josparlaıtynyn aıtty.
Kóbine AQSh, Reseı, Ulybrıtanııa, Indııa jáne Germanııanyń azamattary paıdalanatyn álemdik TripAdvisor tuǵyrnamasynan týrısterdiń Almatyǵa degen qyzyǵýshylyǵyn naqty kórýge bolady. Munda qalaǵa degen suranys 465-ten 66 824-ke ulǵaıǵan.
Al qala ákiminiń orynbasary Murat Dáribaev kólik toraptarynyń jetildirilip jatqanyn aıtty. Kelesi aıdan bastap barlyq qalaaralyq jáne halyqaralyq jolaýshy tasymaly «Saıran» avtobeketi arqyly iske asatyn bolady. Qazirgi kezde ǵımarat qaıta jasalýda, kólik-logıstıkalyq ınfraqurylymy jetildirilip, jeńil kólik turaqtary men halyqaralyq qatynas aımaǵy keńeıtilmek. Nysan ishinde lokaldi týrıstik ortalyq jumysy jolǵa qoıylyp, onda týroperatorlar alys-jaqyn sheteldermen baılanysta bolady. Qoǵamdyq tamaqtaný oryndary da zamanǵa saı qyzmet etedi. Sonymen birge «Almaty-1» jáne «Almaty-2» temirjol vokzaldaryn qaıta jasaý jumystary qolǵa alynǵan. Eki júz avtokólikti qysqa merzimge jalǵa berý qyzmeti jolǵa qoıylatyn bolady. О́tken jyly 479 qoǵamdyq kólik qala turǵyndaryna qyzmet etken bolsa, bıylǵy jyly 569 jańa avtobýs jolǵa shyǵady. Osy otyrysta magıstraldi kóshelerdiń boıyndaǵy páterlerdi jalǵa berý máselesiniń de zań sheńberinde jumys isteýi tıis ekendigi aıtyldy.
Qazaqstan týrıstik assosıasııasynyń dırektory Rashıda Shaıkenova Ile Alataý saıabaǵynda týrısterdiń foto jáne beınekamera paıdalanýy qanshalyqty aqyly bolatyndyǵy týraly másele kóterse, Ile Alataý parkiniń bas dırektory Damır Malgeldıev tek kommersııalyq túsirilimderge ǵana aqy alynatyndyǵynan habardar etti. Basshynyń aıtýynsha, qazirgi kezde Ile Alataýy parkin damytý týraly tujyrymdama jasalǵan.
Elvıra Serikqyzy,
«Egemen Qazaqstan»
Almaty
