Radio Marca-nyń habarlaýynsha Lopetegıdiń Madrıdke baratynyn alǵashynda «Realdyń» alty fýtbolshysy ǵana bilipti. Alaıda kóp uzamaı bul málimet ózge klýbtyń bir ókiline de jetken kórinedi. Túrli BAQ ol oıynshynyń «Real» týraly keraǵar pikir bildiretin Jerar Pıke ekenin jarııalap jatyr. Lopetegı sybystyń tarap ketýinen saqtanyp, «Real» basshylyǵyna resmı túrde jarııalaýyn ótinipti.
Bir aıta keterligi Lopetegı 22 mamyr kúni Ispanııa quramasymen 2020 jylǵa deıin kelisimshartyn uzartyp qoıǵan. Arada bir apta ótkennen soń «Realdyń» burynǵy jetekshisi Zınedın Zıdan Madırdten ketetinin málimdegennen keıin komanda basshylyǵy jańa koýchti izdeýge kiristi. Tańdaý ıspanııalyq mamanǵan túskeni kópshilikti tań qaldyrǵany jasyryn emes. Marca basylymy Lopetegı men qurama arasyndaǵy kelisimshartty ýaqytynan buryn úzý úshin koroldik Ispanııa fýtbol federasııasyna eki mln eýro tóleıtinin habarlady.
Shyny kerek Hýlen Lopetegıdiń Madrıdke baratynyn eshkim boljap bilgen emes, kópshilik kútken joq. Onyń kandıdaty tipti jurt kútken bapkerlerdiń arasynda da bolǵan emes. Zıdan «Realmen» qoshtasqan kezde býkmekerler kelesi bapker kim bolatyny jaıly bás tigý isin qabyldaı bastady. Bul tizimde «Tottenhemniń» jattyqtyrýshysy Maýrısıo Pochettıno kósh bastap turǵan. Sondaı-aq Arsen Venger, Gýtı, Massımılıano Allegrı, Antonıo Konte, Maýrısıo Sarrı, Andre Vıllash-Boash, Lýıs Felıpe Skoları, Tıte, Ioahım Lıov sekildi mamandardyń qarasy kóringen.
Biraq «Real» prezıdenti Florentıno Perestiń oıy múldem basqa jaqtan shyqty. Ol kelisimge kelý jaǵynan da, qarjylyq turǵydan da yńǵaıly ári ıspanııalyq oıynshylarmen birden til tabysatyn kandıdattardy qarastyrǵan sekildi. Al Lopetegı «Real» úshin tańsyq emes. Ol fýtbolshy retinde de, bapker retinde de Madrıdtiń qyzý tirshiligin kórgen.
Qandaı komandalardy jattyqtyrdy?
Hýlen Lopetegı oıynshy kezinde qaqpashy bolǵan. Aıta keter bir jaıt ol «Realdyń» ejelgi qarsylasy «Barselonada» da óner kórsetken. Alaıda negizgi quramnan oryn ala almaı el-Klassıko ıeleriniń qosalqy tizimdegi oıynshysy boldy. «Raıo Valekano» qaqpasyn bes jyl qorǵaǵannan keıin 2002 jyly úlken sporttan ketti.
Úlken sporttan ketkenmen fýtboldan qol úzip qalmady. Bapker retinde ózin synap, «Raıo Valekanony» 2003 jyly jattyqtyrǵan. Alaıda tájirıbesi jete qoımady. Lopetegıdiń qol astynda bul ujym nebári 10 oıyn kórsetti. Ol tusta «Raıo» Ispanııanyń ekinshi deńgeıli Segýndasynda óner kórsetkennen keıin árbir match mańyzdy bolatyn. Lopetegıge uzaq ýaqyt berilmedi.
Osydan keıin Hýlen bes jyl fýtboldan qol úzip, tek 2008 jyly oraldy. 2008/2009 maýsymynda «Realdyń» farm-klýbyna jetekshilik etti. Al ary qaraı jumysyn ulttyq quramalarmen baılanystyrdy. 2010-2014 jyldar aralyǵynda Ispanııa U19, U20 jáne U21 ujymyn jattyqtyrdy. Ol 19 jastaǵy oıynshylarmen Eýro-2012 dodasyn jeńip aldy, keler jyly jastar quramasymen Eýro-2013 týrnırin utyp, biliktiligin dáleldeı tústi.
Ol 2014 jyly Portýgalııanyń «Portýyna» ketti. Onyń jetekshiligimen «aıdaharlar» alǵashqy maýsymda chempıonatty ekinshi orynmen aıaqtap, chempıon atanǵan «Benfıkadan» nebári úsh upaı qalyp qoıdy. Alaıda keler jyly ujymnyń kórsetkishi nasharlaı túskendikten ýaqytynan buryn qyzmetinen bosatyldy.
2016 jyly Ispanııa quramasynan Vısente Del Boske ketkennen keıin ornyna Lopetegı taǵaıyndaldy. Ol «qyzyl fýrııalarmen» birge álem chempıonatynyń irikteý kezeńin esh qınalmastan aıaqtady. Ispanııa bul aralyqta Italııamen ǵana bir oıynda teń oınap, upaı joǵaltty.
Ispanııany kim jattyqtyrýy múmkin?
О́tken aıda ǵana Lopetegı ulttyq quramamen kelisimshart merzimin uzartty. Osyǵan qarap-aq Hýlenniń eki apta buryn «Real» týraly múldem oılamaǵanyn bilýge bolady. Endi Ispanııanyń aqparat quraldary onyń izbasary týraly boljam jasap jatyr.
Tizimde «Roma», «Selta», «Barselona» klýbtarynyń eks-jattyqtyrýshysy Lýıs Enrıke bar. Biraq «Barselonamen» úlken jetistikke jetken maman federasııadan az jalaqy talap etpesi belgili. Odan keıingi orynda «Hetafe», «Sevılıa», «Olımpıakos», «Marsel» jáne «Malaga» klýbtarynyń burynǵy jetekshisi Mıchel tur. Sondaı-aq Ispanııanyń jastar quramyn jattyqtyratyn Albert Seladestiń kandıdatýrasy da bar.
Lopetegı: Messı tarıhtaǵy úzdik oıynshy
Lopetegı keler maýsymda «Realda»... Endń komandanyń bas juldyzy Krıshtıaný Ronaldýmen qanshalyqty til tabysa alatyny kópshilikti qyzyqtyryp otyr?! Ol osyǵan deıingi suhbattarynda portýgalııalyqtyń basty básekelesi Lıonel Messıdi eń úzdik oıynshy sanaıtynyn birneshe ret málimdegen.
Máselen 2016 jyldyń qarashasynda AS TV arnasyna mynadaı pikir bildirdi: «Altyn dop» júldesi? Men Messıdi birinshi, Ramosty ekinshi, Ronaldýdy úshinshi orynǵa qoıdym. Osyǵan deıin Messı sekildi turaqty deńgeıde oınap kele jatqan oıynshyny kórgen emespin», degen.
Al birer apta buryn 20 minutos basylymyna bergen suhbatynda argentınalyq shabýylshyny kezekti ret úzdik oıynshy retinde esepteıtinin aıtty.
«Leo Messı men kórgen oıynshylardyń ishindegi eń úzdigi. Ol sekildi fýtbolshyny kórýimiz ekitalaı. Eshbir oıynshy komandany Messı sekildi tyǵyryqtardan shyǵarǵan emes. Onyń oıynyn kórip otyryp, rahattanasyń. Men úshin ol fýtbol tarıhyndaǵy eń úzdik oıynshy», degen edi Hýan Lopetegı.
Osyndaı pikirlerinen keıin kózqarasyn ózgerter me eken?! Alaıda Krıshtıaný Ronaldý Chempıondar lıgasynyń fınalynan keıin osy jazda «Realdan» ketýi múmkin ekenin málimdegen. Bálkim Lopetegı qazirden-aq portýgalııalyqtyń Madrıdten ketetinin biletin bolar!
Daıyndaǵan
Aıan ÁBDÝÁLI,
«Egemen Qazaqstan»
