Álem chempıonatynyń bastalýyna bir kún qalǵanda bapkerdiń qyzmetinen bosatylýy Rýbıalestiń bastamasy bolyp otyr. Lopetegıdiń ulttyq quramamen 2020 jylǵa deıin jańa kelisimshartqa otyrǵanyna bir aı da bola qoıǵan joq. Osyndaı mindeti bola tura «Realmen» kelisimshart jasaýyn Ispanııa fýtbol federasııasynyń prezıdenti satqyndyqqa balap, ony jumysynan qýýdy keshe talap etken.
«Biz bas bapkerdiń qyzmetinen bas tartýymyzǵa týra keldi. Oǵan aldaǵy ýaqytta tek sáttilik tileımiz. О́zimdi satqyn retinde sezinbeımin. Másele «Realdyń» búkil jumysty Ispanııa federasııasynyń tý syrtynan istegeninde bolyp tur. Biz buny nazardan tys qaldyra almaımyz. Ispanııa quramasynyń barlyq qyzmetkeri arnaıy qabyldanǵan ereje baryn umytpaýy tıis. Lopetegıdiń kásibıligine daý joq. Biraq kez kelgen is ereje boıynsha júzege asyrylýy kerektigin este saqtaǵan jón», dedi Rýbıales.
Ispanııa fýtbol federasııasynyń sheneýnikteri Lopetegıdiń qyzmetinen bosatylýyn qoldasa, Andres Inesta, Serıhıo Ramos, Davıd Sılva bastaǵan oıynshylar bul iske qarsylyq bildirdi. Bir qyzyǵy Marca basylymy birer saǵat buryn fýtbolshylardyń bas bapkerdi ornynda qaldyrýyn kóndirgenin habarlaǵan.
«Real» bilikti bapker izdep, úzdikterdiń birine toqtalǵanyna kúmánim joq. Biraq ulttyq qurama eldegi búkil klýbtyń komandasy ekeni umytpaıyq. Bári óz ornymen bolýy tıis. Resmı aqparattyń shyǵýyna bes mınýt qalǵanda federasııany qulaǵdar etý durys emes», dedi Lýıs Rýbıales.
Endi Ispanııa quramasyn álem chempıonatynda Fernando Ierro (Ispanııa fýtbol federasııasynyń sport dırektory) nemese Albert Selades (Ispanııa U-21) jattyqtyrady dep kútilip otyr. Ekeýi de delegasııa quramynda Reseıge kelgen.
Aıta keteıik, keshe «Real» basshylyǵy álem chempıonaty aıaqtalǵannan keıin komandany Hýlen Lopotegı jattyqtyratynyn habarlaǵan. Al Ispanııa quramasy men bapker arasyndaǵy jańa kelisimshartty ýaqytynan buryn buzý úshin «Real» eki mln eýro tólegen.
