Bul másele búginde «Nur Otan» partııasynyń bastamasyna oraı el óńirlerinde qanat jaıa bastaǵany belgili. Sonyń aldyńǵy leginde Aqtóbe oblysy tur. Tegin oqytylatyn IT-synyptardyń kókjıegin keńeıtý úshin materıaldyq bazaǵa qosa tıisti maman-pedagogter ázirleý isiniń mańyzy joǵary. Osyǵan oraı qazirdiń ózinde 21 pedagog arnaıy daıyndyqtan ótkizilgen. Buǵan qosa, 35 oqytýshy osy salaǵa mamandaný ústinde. Qazirgi kúni oblysta IT-synyptar jasaqtaý isi bel ortadan asyp keledi. Onyń bári bıýdjetten tys kózder esebinen qarjylandyrylǵan.
– Bul – «Nur Otan» partııasynyń qyzmetin jańǵyrtý aıasynda belgilengen basty jobalardyń biri. Oqýshylarǵa baǵdarlamalyq baǵyttar men robot tehnıkasymen qurastyrýdyń basty negizderin úıretetin oqytýdyń zamanaýı tásili buǵan deıingi ınformatıka páni atqaryp kelgen mindetterden ózgesheleý. Ekeýiniń atqaratyn qyzmeti eki bólek. Biz ony júrgizýdi sheteldiń ozyq ádis-tásilderi negizinde odan ári jetildire túsýdi oılastyryp otyrmyz. Árıne dál kóshirilgen kúıinde emes, onyń bári óz memleketimizdiń mentalıtetin eskere otyryp engiziledi, – dedi M.Áshimbaev.
Sondaı-aq oblys mektepterindegi ashanalar júıesin jańǵyrtý isimen tanysý sátinde ol bul iste tıisti standarttyq júıe jasaqtaý qajettigine toqtaldy. Soǵan saı balalardyń toıyp tamaq ishýi shart bola qoımaıdy. Eń bastysy, mekteptiń ashanalar mázirinde dárýmenniń qunary mol taǵam túrleri mol bolýy tıis. Sonymen birge jas óskinderdi tamaq ishý mádenıetine daǵdylandyrý isi de artyqtyq etpeıdi. Osy rette Máýlen Saǵathanuly Aqtóbe oblysynyń mektepterinde memleket-jekemenshik áriptestigi negizinde qurylǵan mektep ashanalary júıesine oń baǵa berdi.
«Nur Otan» partııasy qolǵa alǵan baǵdarlamalardyń basty bir baǵyty «Rýhanı jańǵyrý» dep atalady. Qazirgi kezde partııanyń bastamasyna sáıkes otandyq kitaphanalardy jańǵyrtýdyń jáne ony qazirgi zamanǵy bilim ortalyqtaryna aınaldyrýdyń keń aýqymdy baǵdarlamasy belgilengen. Mundaǵy basty erekshelik, atalǵan istiń tek qalalar men oblys ortalyqtarynda ǵana emes, sonymen birge aýyldyq jerlerde de joǵary standarttarǵa sáıkes bolýy basty nazarǵa alynýynda. Osyndaı bıik talaptarǵa jaýap bere alatyn rýhanı ortalyqtyń biri Alǵa aýdanyna qarasty Bestamaq aýyldyq kitaphanasy bolyp otyr.
Partııa Tóraǵasynyń birinshi orynbasary elimizdiń shalǵaı aýdandarynyń birinde ornalasqan osy aýyldyq kitaphananyń qyzmetimen tanysyp, mundaǵy oń tájirıbelerdi elimizdiń barlyq aýyldyq kitaphanalaryna úlgi retinde usynýǵa bolatynyn málimdedi. Atalǵan eldi mekendegi kitaphana «Nur Otan» partııasy jobasynyń ıgiligi men tıgizgen shapaǵaty negizinde jańǵyrtylǵanyn aıtty.
Sonymen birge Bestamaq aýylyndaǵy orta mektepterdiń janynan «Mektepterdiń sport alańdaryn túbirimen qaıta jasaqtaý» atty partııalyq joba sheńberinde qurylǵan bilim ordasynyń ámbebap sport alańy da alystan menmundalaıdy. «Mine, taǵy bir úlgi, taǵy bir ónege osy sport alańynan kórinedi», dep joǵary baǵa berdi partııa basshysynyń birinshi orynbasary. Atalǵan sport kesheni oblysta iske asyrylyp jatqan «Baqytty bala» jobasy aıasynda turǵyzylǵan. Munda oqýshylardyń fýtbol, voleıbol, basketbol, gandbol jáne tennıspen emin-erkin shuǵyldanýyna barlyq jaǵdaı jasalǵan. Keshenniń taǵy bir ereksheligi, atalǵan sport túrleri boıynsha úıirmeler jumys isteıdi.
«Nur Otan» partııasynyń búgingi kúni jańǵyrtý aıasynda qolǵa alǵan jobalarynan bólek munyń aldyndaǵy burynǵy jobalar da qazirgi kúnge deıin sabaqtastyǵyn úzbeı keledi. Sonyń biri – «Kedergisiz keleshek» jobasy. Bul joba múmkindigi shekteýli balalar men eresekterge qoldaý kórsetýge baǵyttalǵan. Partııa belgilegen osyndaı talaptar men mindetterge tolyq jaýap bere alatyn Aqtóbe oblysyndaǵy «Kúnshýaq» ataýyn ıelengen balalardy saýyqtyrý lageri bolyp otyr.
Tek elimizde ǵana emes, sonymen birge TMD aýmaǵynda balamasy joq áleýmettik mekeme týabitti ártúrli dertterge, aýtızmge jáne Daýn sındromyna shaldyqqan balalardyń demalýyna jáne emdik gımnastıkamen shuǵyldanýyna arnalǵan. Tipti munda múgedek balalardyń analary birge bolýy úshin de tıisti jaǵdaılar qarastyrylǵan. M.Áshimbaev oblystaǵy «Kúnshýaq» arnaıy lageri respýblıkanyń ózge óńirleri úshin basty bazalyq qurylym retinde ádistemelik tájirıbeni bólise alatynyn aıtty.
Aqtóbe oblysyna sapary aıaqtalǵan soń Máýlen Saǵathanulyna óńirge jasaǵan sapar qorytyndysy boıynsha saýal qoıýdyń sáti tústi.
– Aqtóbe oblysyna jasaǵan saparymyzdyń aıasynda biz Aqtóbe oblysynyń ákimi, partııa oblystyq fılıalynyń tóraǵasy Berdibek Saparbaev jetekshilik jasaıtyn fılıaldyń jumysymen tanysyp, olar Elbasy tapsyrmalaryn oryndaýda nátıjeli jumystar tyndyrǵanyna kóz jetkizdik. О́ńirde sıfrlandyrý deńgeıi de joǵary. Bir sózben aıtqanda, «Nur Otan» partııasy Saıası keńesiniń otyrysynda Memleket basshysy qoldaý bildirgen partııalyq jobalardyń bári Aqtóbe oblysynda oıdaǵydaı iske asyrylyp jatyr dep aıtýǵa bolady. Sondaı-aq birqatar baǵyttar boıynsha aımaqta iske asyrylǵan oń tájirıbelerdi ózge óńirlerge de engizýdiń bereri mol dep esepteımin, – dedi M.Áshimbaev.
Saparynyń sońynda M.Áshimbaev «Nur Otan» partııasynyń Aqtóbe oblystyq aktıvimen kezdesip, partııalyq jobalardy júzege asyrýdyń tıimdi tetikterin jan-jaqty saralap berdi. Sondaı-aq aqtóbelik nurotandyqtarǵa birqatar tyń mindet júktedi.
Temir QUSAIYN,
«Egemen Qazaqstan»
AQTО́BE
