Monıtorıng ádisnamasy «Oqytýshy stýdentterdiń kózimen», «Oqytýshy áriptesterdiń kózimen», «Stýdentterdiń qanaǵattanýyn baǵalaý», «Ýnıversıtet túlekterdiń kózimen», «Sybaılas jemqorlyqty qabyldaý ındeksi» sııaqty jappaı jáne iriktelgen suraq-jaýaptarǵa negizdelgen saýaldamalar serııasyn qamtıdy. Olar JOO-lardaǵy sybaılas jemqorlyqqa qarsy saıasattyń jaı-kúıin jáne tıimdiligin baǵalaýdyń biryńǵaı júıesin quraıdy.
Oǵan ál-Farabı atyndaǵy QazUÝ-diń «Sybaılas jemqorlyqtan tys ýnıversıtet» atty jobasynyń aıasynda jeti jyl boıy qalyptasqan praktıkalyq ázirlemeleri negiz bolyp otyr. Atalǵan jobany júzege asyrý ýnıversıtettiń barlyq salasynda jemqorlyqqa qarsy tehnologııalar keshenin engizýdi jáne olardyń tıimdiligin únemi baǵalaýdy qamtamasyz etpek.
Sybaılas jemqorlyqqa qarsy is-qımyl monıtorıngi júıesi stýdentter men oqytýshylar turǵysynan sybaılas jemqorlyqty qabyldaý ındeksin anyqtaýǵa múmkindik beredi. Ol oqytýshylardyń korporatıvtik mádenıet normalary men kásibı qundylyqtardy ustanýy, bilim berý jáne oqý-tárbıe úderisiniń ashyqtyǵy, oqý jetistikterin baǵalaýdyń obektıvtiligi men akademııalyq shynaıylyq, kórsetiletin qyzmet sapasy deńgeıimen qanaǵattaný dárejesi jáne JOO ortasynda josyqsyz praktıkalardyń taralýy sııaqty mańyzdy parametrler boıynsha baǵalaýdy qamtıdy.
Aýqymdy zertteýlerdiń qorytyndysy boıynsha fakýltetter men kafedralardyń sybaılas jemqorlyqqa qarsy reıtıngi jasalyp, onyń nátıjeleri QazUÝ Ǵylymı keńesiniń otyrysynda keńinen talqylandy. «SANALY URPAQ» jobalaý ofısiniń basshysy Qaıyrjan Toqýshev atap ótkendeı, mundaı áleýmettik zertteýler barlyq joǵary oqý oryndarynda júrgizilýi tıis. óıtkeni bul sybaılas jemqorlyqtyń aldyn alý jáne oǵan qarsy kúres boıynsha naqty sharalardy ýaqtyly qalyptastyrýǵa kómektesedi. Jobalaý ofısi monıtorıng júıesi men ony ótkizý tájirıbesin Almatydaǵy barlyq JOO-larǵa sybaılas jemqorlyqqa qarsy is-qımyldardy zertteý jáne paıdalaný úshin usynatyn bolady.
«SANALY URPAQ» jobalyq ofısi ústimizdegi jyldyń kókteminde ál-Farabı atyndaǵy Qazaq ulttyq ýnıversıteti negizinde Memlekettik qyzmet isteri jáne sybaılas jemqorlyqqa qarsy is-qımyl agenttiginiń bastamasymen ashylǵan. Agenttik tóraǵasy Alık Shpekbaev, Almaty qalasynyń ákimi Baýyrjan Baıbek jáne ál-Farabı atyndaǵy QazUÝ rektory Ǵalym Mutanov bilim berý salasyndaǵy sybaılas jemqorlyqqa qarsy is-qımyl tetikterin engizý týraly úshjaqty kelisimge qol qoıǵan bolatyn.
Arman OKTIаBR,
«Egemen Qazaqstan»
ALMATY
