Búginde qoǵamdyq kólikterdiń qorshaǵan ortaǵa tıgizetin zııandy áserlerin azaıtý, qyzmet sapasyn jaqsartý basty máselelerdiń biri sanalady. Qalalyq ákimdiktiń otyrysynda Birikken Ulttar Uıymy Damý baǵdarlamasy sarapshylarynyń bir jyl boıy jergilikti qoǵamdyq kólik jaǵdaıyn zerttep, jumys júıesin jaqsartýǵa baǵyttalǵan monıtorıngtiń qorytyndylary shyǵaryldy. Ondaǵy maqsat–ekologııaǵa taralatyn zııandy qaldyqtar mólsherin anyqtaý, aldyn alý, boldyrmaý sharalaryn usyný.
«BUU-nyń Damý baǵdarlamasynyń ókilderi Qazaqstannyń birqatar qalalarynda ekologııanyń jaqsarýyna, «jasyl ekonomıkanyń» túzilýine óz úlesin qosyp keledi. Osy jolǵy zertteý jumystary jolaýshylar tasymalyn jetildirý salasynda eleýli problemalardyń oryn alyp otyrǵanyn baıqatty», dedi Damý baǵdarlamasynyń sarapshysy, Amsterdam qalasy jolaýshylar kóligi boıynsha aǵa keńesshi Gýıdo Brýggeman.
Onyń aıtýynsha aqparattandyrý júıesin jaqsartý, avtobýstardyń júrý kestesin ońtaılandyrý, ýaqytty kórsetetin elektrondyq tablo ornatý júrgizýshiler jáne júrginshiler úshin kóptegen qolaıly múmkindikter týǵyzady. Ekinshiden, eski kólikterdi ekologııalyq jaǵynan tıimdi jańalarymen almastyrý, úshinshiden JPS baqylaýyn ornatý, tórtinshiden biryńǵaı bıletti engizý mańyzdy. Jolaýshy baratyn jerge jetý úshin eki nemese úsh avtobýsty almastyrǵannyń ózinde biryńǵaı bılet júıesin qarastyrǵan jón.
Petropavl qalalyq turǵyn úı kommýnaldyq sharýashylyǵy, jolaýshylar kóligi jáne avtomobıl joldary bóliminiń sektor meńgerýshisi Erjan Aqapov tasymaldaýshy kompanııalar óz qarajatyna 6 jańa avtobýs satyp alǵanyn, jyl sońyna deıin Eýro-5 standartyna jatatyn taǵy 20 avtobýs kólik satyp alatynyn jetkizdi.
Ázirge jańa ózgerister jolaqynyń baǵasyna qanshalyqty áser etetini belgisiz.
О́mir ESQALI,
"Egemen Qazaqstan"
Petropavl
