Taraptar mádenı-gýmanıtarlyq baılanystardy, sonyń ishinde bilim berý jáne týrıstik klasterdi damytý tájirıbesin almasý boıynsha yntymaqtastyqty nyǵaıtý máselelerin talqylady.
Qazaqstannyń táýelsizdik jyldary eki el arasynda barlyq baǵyttar boıynsha seriktestik qatynastary ornyqty. Búgingi kúni Almatyda fransýz kapıtalymen saýda, tamaq ónerkásibi, kólik pen telekommýnıkasııa salalary boıynsha 60-tan astam kásiporyn jumys isteıdi. Almaty men Fransııa arasyndaǵy taýar aınalymy bıylǵy jyldyń birinshi toqsanynda 13%-ǵa ósken. Bulardan ózge, megapolıste Fransııa mádenıeti men ónerine qatysty túrli sharalar qala turǵyndary arasynda jıi ótip turady.
Kezdesý barysynda Per Kabare eki el arasyndaǵy yntymaqtastyqtyń eń aldymen senim men dostyqqa negizdelgenin atap ótti.
«Bul meniń Almatyǵa alǵash kelýim, baıqaǵanym qala zamanaýı trendter men jańa tehnologııalar aksenti boıynsha damý ústinde eken.Taýlardyń tym jaqyn ornalasýy - Almatynyń týrıstik tartymdylyǵynyń taptyrmas artyqshylyǵy. Osy baǵytty damytýda fransýz kompanııalarynyń tájirıbesi mol, bul eki jaqty baılanysty odan ári nyǵaıtýdyń taǵy bir salasy», - dep atap ótti Fransııa Ulttyq assambleıasynyń depýtaty.
Qazirgi kezde Almatyda «Alıans Fransez» ókildigi bar. Abaı atyndaǵy ulttyq pedagogıkalyq ýnıversıtette Orta Azııadaǵy alǵashqy «Sorbonna-Qazaqstan» ınstıtýty jumys isteýde.
Al 2016 jyly Fransııa astanasy Parıjde IýNESKO aıasynda Almatynyń 1000 jyldyǵy merekelendi. Almaty men Renn qalalary baýyrlastyǵynyń 25 jyldyǵy qurmetine Abaı eskertkishi ashyldy.
Al kúz aıynda Almatyda «Sıfrly kúz» festıvalin ótkizý jsoparlanǵan, munda qala turǵyndary men qonaqtary sıfrly tehnologııalar arqyly fransýz mádenıeti jáne ónerimen tanysatyn bolady.
Elvıra Serikqyzy,
«Egemen qazaqstan»
ALMATY
