Parlament Senaty Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Asqar Beısenbaev sharany asha kelip, mashına jasaý – ındýstrııasy damyǵan memlekettegi ekonomıkanyń mańyzdy salasy ekenin atap ótti. Mashına jasaý salasynyń ornyqty damýy men senimdi qyzmet etýi eńbek ónimdiligin arttyryp, óndiristegi ekologııalyq qaýipsizdik deńgeıi men elimizdiń ekonomıkalyq qaýipsizdigin kórsetedi.
A.Beısenbaev Memleket basshysy Nursultan Nazarbaev 2018 jylǵy 10 qańtardaǵy «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýynda ındýstrııalandyrý on mindettiń alǵashqysy bolyp belgilegenin eske salyp, bul sala elimizdiń damýy men jańa tehnologııalardy engizý barysynda kósh basynda turýy tıis ekenin atap ótti.
Senatordyń pikirinshe, sandyq tehnologııany, onyń ishinde blokcheın sekildilerdiń jappaı engizilýin qamtamasyz etý kerek, ol júkter qozǵalysyn onlaın túrinde qadaǵalaýǵa jáne tranzıttiń kedergisiz ótýine, keden operasııalaryn ońaılatýǵa múmkindik beredi.
A.Beısenbaev qazirgi zamandaǵy mindetter mashına jasaýshylarǵa jańa tehnologııalardy engizýdi, eńbek ónimdiligin arttyrý men eksportqa baǵdarlanǵan básekege qabiletti ónimder óndirýdi talap etetinin atap ótti. Tabysqa qol jetkizýge nıettengen kásiporyndarǵa tıimdilikti arttyrýǵa, tehnıkalyq jańarýlarǵa qarjy bólýge, básekege qabiletti ónim óndirýine jáne jańa naryqtardy ıgerýine jan-jaqty kómek kórsetiletin bolady.
Senat depýtaty Erik Sultanov temirjoldaǵy mashına jasaý salasynyń maqsattary men mindetteri týraly baıandama jasady. Ol myńdaǵan jas mamandarǵa osy saladan turaqty jumys berilgenin atap ótti. Aralas salalarda ondaǵan myń jumys oryndary ashyldy. О́ndiristi jańa tehnologııalarmen jabdyqtaýǵa jáne jańa tehnologııa engizýge jeke menshik bıznes mıllıardtaǵan ınvestısııa berip otyr.
E.Sultanov elimizdiń kólik-logıstıka kesheniniń, onyń ishinde kólikke qatysty mashına jasaý salasynyń aldynda turǵan mindetterdi oryndaý úshin memleket barlyq qajetti jaǵdaılardy jasap kele jatqanyn atap ótti. Zań shyǵarý organy salany zańnamalyq turǵyda qamtamasyz etip keledi.
Sharaǵa «Qazaqstan temir joly» ulttyq kompanııasy» aksıonerlik qoǵamynyń Basqarma tóraǵasy Qanat Alpysbaev bastaǵan sala ókilderi qatysty.
Kezdesý aıasynda senatorlar «Nurly jol» temirjol vokzalyn, «Lokomotıv qurastyrý zaýyty» AQ, «Elektrovoz qurastyrý zaýyty» JShS, «Tulpar - Talgo» JShS jáne Astanadaǵy «QTJ» UK» Temirjol kóligi qyzmetkerlerin baǵalaý jáne damytý ortalyǵyn aralady.
