Foto: liter.kz
Kezdesý kezinde G.Ábdiqalyqova elimizdiń ishki saıasatyndaǵy mańyzdy baǵyttarǵa nazar aýdardy. Elbasy Nursultan Nazarbaevtyń tapsyrmasymen ekonomıka, saıasat jáne qoǵamnyń jańǵyrýyn qamtıtyn júıelik jańǵyrý júrgizilip jatqanyn atap ótti. Sondaı-aq Memleket basshysynyń jańa álem kóshbasshylarynyń qataryna qosylýǵa negizdelgen «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýy iske asyrylyp jatqanyn jetkizdi.
Memlekettik hatshy keń aýqymdy baǵyttardaǵy joǵary deńgeıli saıası senimdi jáne qurylymdy kelissózdiń arqasynda ekijaqty qarym-qatynas nyǵaıyp, yntymaqtastyq strategııalyq mártebege ıe bolǵanyn aıtty.
«Túrikmenstan Qazaqstan úshin Ortalyq Azııadaǵy tatý kórshi men senimdi seriktes qana emes, baýyrlas memleket. Bizdiń elderdi mádenı ortaqtyq, shynaıy dostyq pen ózara is-qımyl baılanystyrady», dedi G.Ábdiqalyqova.
Sonymen qatar kezdesý barysynda Qazaqstan men Túrikmenstannyń túrli kópjaqty alańdarda belsendi seriktes ekeni sóz boldy. Parlamentaralyq jáne vedomstvoaralyq baılanystar nyǵaıyp keledi. О́ńiraralyq baılanystar keńeıip, ekonomıkalyq yntymaqtastyq jónindegi úkimetaralyq komıssııa jumysy jolǵa qoıylǵan.
«Araldy qorǵaý halyqaralyq qory óńirlik ózara qarym-qatynastyń mańyzdy alańy bolyp qala beredi», dedi Memlekettik hatshy.
Jalpy, Qazaqstan men Túrikmenstanda kómirsýtek resýrstarynyń qory mol. Sondaı-aq tranzıttik-kóliktik áleýeti zor. Ekijaqty saýda-ekonomıkalyq baılanys damyp keledi. Máselen, 2017 jyly taýar aınalymy 99,3 mıllıon dollardy qurady.
Kezdesý sońynda G.Ábdiqalyqova elshige budan ári tatý kórshi retinde ózara qarym-qatynasta jáne strategııalyq seriktestikte mol tabys tiledi.
Abaı ASANKELDIULY,
«Egemen Qazaqstan»
